ଦେବଗଡ଼: ବାରକୋଟ ବ୍ଲକ ବିଜାଡ଼ିହି ଗାଁରେ ଛେଳି ମଡ଼କ ଦେଖାଦେଇଛି । କୌଣସି ଅଜଣା ରୋଗ କାରଣରୁ ଦଶଦିନରେ ୬୦ରୁ ଅଧିକ ଛେଳି ମରିଯାଇଥିବା ଦେଖିବାକୁ ମିଳିଛି । ଏପରିକି ଅନେକ ଛେଳି ଏଥିରେ ଆକ୍ରାନ୍ତ ହୋଇଥିବା ଜଣାପଡିଛି । ଏହା ଦ୍ବାରା ଛେଳିଚାଷ କରି ଜୀବିକା ନିର୍ବାହ କରୁଥିବା ପାଉଡ଼ିଭୂୟାଁ ଜନଜାତିର ଲୋକେ କ୍ଷତିଗ୍ରସ୍ତ ହୋଇଛନ୍ତି । ଏଥିପାଇଁ ପ୍ରଶାସନିକ ସ୍ତରରେ କୌଣସି ପଦକ୍ଷେପ ନିଆଯାଇନଥିବା ଗ୍ରାମବାସୀ କହିଛନ୍ତି ।
ସରୁଆଳି ପଞ୍ଚାୟତର ବିଜାଡ଼ିହି ଗାଁରେ ଅଜଣା ରୋଗରେ ଦଶଦିନରେ ମଲେଣି ୬୦ରୁ ଅଧିକ ଛେଳି । ଏବେବି ଗାଁର ଅନେକ ଛେଳି ଏହି ରୋଗରେ ଆକ୍ରାନ୍ତ ଅଛନ୍ତି । ଛେଳି ମାନଙ୍କ ନାକରୁ ପାଣି ବାହାରିବା ଓ ପେଟ ଫୁଲିଯିବା କାରଣରୁ ଛେଳିମାନେ ଠିକ ଭାବେ ଚରାବୁଲା କରିନପାରି ମୃତ୍ୟୁବରଣ କରୁଥିବା ଜଣାଯାଇଛି । ଜିଲ୍ଲାରେ ଅତ୍ୟଧିକ ଥଣ୍ଡା ପ୍ରବାହ କାରଣରୁ ଛେଳି ମୃତ୍ୟୁ ହେଉଥିବା ସାଧାରଣରେ ସନ୍ଦେହ କରାଯାଉଥିବା ବେଳେ ଏହାର ସଠିକ କାରଣ ଏପର୍ଯ୍ୟନ୍ତ ଜଣାପଡିନାହିଁ । ଫଳରେ ଛେଳିଚାଷ କୁ ମୁଖ୍ୟ ଜୀବିକା ଭାବେ ଗ୍ରହଣ କରିଥିବା ଗ୍ରାମବାସୀ ଙ୍କ ମଧ୍ୟରେ ଭୟ ଓ ଆତଙ୍କ ଖେଳି ଯାଇଛି ।
ସୂଚନାଯୋଗ୍ୟ ଯେ , ସରୁଆଳି ପଂଚାୟତର ବିଜାଡ଼ିହି ଗାଁରେ ବସବାସ କରନ୍ତି ୪୦ଟି ପାଉଡିଭୂୟାଁ ଆଦିମ ଜନଜାତି ପରିବାର । ଏହି ଜନଜାତିର ଆର୍ଥିକ ବିକାଶ କରିବାକୁ ଦେବଗଡ଼ ଜିଲ୍ଲା ରୁଗୁଡାକୁଦର ସ୍ଥିତ ପାଉଡିଭୂୟାଁ ଉନ୍ନୟନ ସଂସ୍ଥା (PBDA) ପକ୍ଷରୁ ଛେଳିଚାଷ ପାଇଁ କିଛିମାସ ପୂର୍ବରୁ ପ୍ରୋତ୍ସାହନ ରାଶି ଯୋଗାଇ ଦିଆଯାଇଥିଲା । ଗ୍ରାମବାସୀ ପ୍ରୋତ୍ସାହନ ରାଶି ପାଇବା ପରେ ଛେଳିଚାଷ ଆରମ୍ଭ କରି ଆସୁଥିଲେ । ମାତ୍ର ବିଗତ କିଛିଦିନ ମଧ୍ୟରେ ଏହି ଗାଁରେ ବ୍ୟାପିଥିବା ଅଜଣା ରୋଗରେ ଅଧିକ ସଂଖ୍ୟାରେ ଛେଳି ମୃତ୍ୟୁବରଣ କରିବା ଓ ଅନେକ ଛେଳି ଆକ୍ରାନ୍ତ ହେବା ଛେଳିଚାଷୀଙ୍କ ଚିନ୍ତା ବଢ଼ାଇ ଦେଇଛି ।
ରୋଗ ନିରୂପଣ ଓ ଏହାର ନିରାକରଣ କରିବା ପାଇଁ ଗ୍ରାମବାସୀ ପାଉଡ଼ିଭୂୟାଁ ଉନ୍ନୟନ ସଂସ୍ଥା କର୍ତ୍ତୃପକ୍ଷଙ୍କ ଠାରୁ ଆରମ୍ଭ କରି ପ୍ରାଣୀଧନ ନିରୀକ୍ଷକଙ୍କୁ ବାରମ୍ବାର ଜଣାଇ ଆସୁଥିଲେ ସୁଦ୍ଧା କୌଣସି ସୁଫଳ ମିଳିପାରି ନାହିଁ । ଫଳରେ ଛେଳିଚାଷୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି ।
ଦେବଗଡ଼ରୁ ସରୋଜ କୁମାର ଶତପଥୀ, ଇଟିଭି ଭାରତ
