ଦେବଗଡ଼: ରାଜ୍ୟର ବିଭିନ୍ନ ସ୍ଥାନରେ ଚାଷୀଙ୍କ ଧାନ କିଣାକୁ ନେଇ ଦେଖାଦେଇଛି ଅନେକ ସମସ୍ୟା । ଦେବଗଡର ଗାନ୍ଧିଜୀ ଓ ଗୋପବନ୍ଧୁଙ୍କ ପ୍ରତିମୂର୍ତ୍ତି ତଳେ ବିକ୍ରି ହୋଇ ନପାରି ପଡିରହିଛି ହଜାର ହଜାର କ୍ବିଣ୍ଟାଲ ଧାନବସ୍ତା । ସେପଟେ ଧାନ ବିକ୍ରୟ କରି ନପାରି ମୁଣ୍ଡରେ ହାତଦେଇ ବସିରହିଛନ୍ତି ଚାଷୀକୁଳ ।
ଦେବଗଡ଼ ଜିଲ୍ଲାରେ ସ୍ଥାଣୁ ପାଲଟିଥିବା ଯୋଗାଣ ବ୍ୟବସ୍ଥାର ଏଭଳି ଏକ ନଗ୍ନଚିତ୍ର ଦେଖିବାକୁ ମିଳିଛି ଚଢ଼େଇମରା କୃଷି ସେବା ସମବାୟ ସମିତିରେ । ଦେବଗଡ଼ ଜିଲ୍ଲା ରିଆମାଳ ବ୍ଲକର ଚଢ଼େଇମରା କୃଷି ସେବା ସମବାୟ ସମିତିରେ ଧାନ କିଣାରେ ଦେଖାଦେଇଛି ବ୍ୟାପକ ଅବ୍ୟବସ୍ଥା ।
ଆଜିକୁ ଦୀର୍ଘ ଏକମାସ ହେଲା ଏହି ସମବାୟ ସମିତି କାର୍ଯ୍ୟାଳୟ ପରିଷଦରେ ପରିତ୍ୟକ୍ତ ଭାବେ ପଡିରହିଛି ହଜାର ହଜାର କ୍ବିଣ୍ଟାଲ ଧାନବସ୍ତା। ନା ଏଠାକୁ ମିଲର ଆସୁଛନ୍ତି , ନା ଯୋଗାଣ ବିଭାଗର ଦେଖା ମିଳୁଛି । ସବୁକିଛି ଯେଭଳି ଠପ ହୋଇ ପଡିଛି ଏଠାରେ । ସୂଚନା ଅନୁଯାୟୀ , ରିଆମାଳ ବ୍ଲକ ନୂଆପଡା ଗ୍ରାମର ଶତାଧିକ ଚାଷୀ ଚଢ଼େଇମରା ସେବା ସମବାୟ ସମିତିରେ ଧାନ ବିକ୍ରି କରିବା ପାଇଁ ଗତ 11 , 18 ଓ 20 ତାରିଖରେ ତିନୋଟି ପର୍ଯ୍ୟାୟରେ ଟୋକନ ପାଇଥିଲେ ।
ସେହି ମୁତାବକ ଚାଷୀମାନେ ଚଢ଼େଇମରା ସେବା ସମବାୟ ସମିତିକୁ ଧାନ ଆଣିଥିଲେ । ମାତ୍ର ବିଡମ୍ବନାର ବିଷୟ ଯେ , ଚାଷୀଙ୍କ ଧାନ କିଣିବା ପାଇଁ ଏଠାରେ ମାସେ ହେଲା ମିଲର କିମ୍ବା ଯୋଗାଣ ବିଭାଗର ଦେଖା ମିଳୁନାହିଁ । ଫଳରେ ସେବା ସମବାୟ ସମିତି କାର୍ଯ୍ୟାଳୟ ପରିଷରରେ ପାଖାପାଖି 3 ହଜାର କ୍ବିଣ୍ଟାଲ ଧାନ ଗଦା ହୋଇ ପଡିରହିଛି ।
ସେପଟେ ଧାନ ବିକ୍ରି କରି ନପାରି ଚାଷୀକୁଳ ମୁଣ୍ଡରେ ହାତଦେଇ ବସି ରହିଛନ୍ତି । ଧାନ ସଂଗ୍ରହ କରୁଥିବା ମିଲରଙ୍କ ପ୍ରତି ଯୋଗାଣ ବିଭାଗ କର୍ତ୍ତୃପକ୍ଷ ତଥା ସ୍ଥାନୀୟ ପ୍ରଶାସନର ଅହେତୁକ ଅନୁକମ୍ପା କାରଣରୁ ସମଗ୍ର ଜିଲ୍ଲାରେ ଧାନ କିଣାରେ ବ୍ୟାପକ ଅବ୍ୟବସ୍ଥା ପରିଲକ୍ଷିତ ହୋଇଛି।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
