ଦେବଗଡ଼: ଧାନ କ୍ରୟରେ ମିଲରର ମନମୁଖୀ କାର୍ଯ୍ୟକଳାପ ଯୋଗୁଁ ମଣ୍ଡିରେ ଦୁଇଦିନ ହେଲା ଖୋଲା ଆକାଶ ତଳେ ପଡିରହିଛି ଶହଶହ କ୍ବିଣ୍ଟାଲ ଧାନ । ନିଜର କଷ୍ଟ ଉପାର୍ଜିତ ଧାନକୁ ମଣ୍ଡିରେ ବିକ୍ରି କରି ନପାରି ଶୀତ କାକରରେ ଜଗି ରହିଛନ୍ତି ଚାଷୀକୁଳ । ଏଭଳି ପରିସ୍ଥିତି ଦେଖିବାକୁ ମିଳିଛି ଦେବଗଡ଼ ଜିଲ୍ଲା ତିଳେଇବଣି ବ୍ଲକ ଅନ୍ତର୍ଗତ ଗାଙ୍ଗନଣ ସେବା ସମବାୟ ସମିତିରେ ।
ସୂଚନାରୁ ଅନୁସାରେ, ମଙ୍ଗଳବାର ଗାଙ୍ଗନଣ ସେବା ସମବାୟ ସମିତିରୁ ଟୋକନ ପାଇଥିବା ଚାଷୀମାନେ ଧାନ ବିକ୍ରି କରିବାକୁ ଆସିଥିଲେ । ମାତ୍ର ଏହି ମଣ୍ଡିରୁ ଧାନ କ୍ରୟ କରୁଥିବା ଜିଲ୍ଲାର ମହାଲକ୍ଷ୍ମୀ ରାଇସମିଲ କର୍ତ୍ତୃପକ୍ଷ ଖରାପ ଧାନ ଦର୍ଶାଇ କ୍ବିଣ୍ଟାଲ ପ୍ରତି ତିନି କିଲୋ ଲେଖାଏଁ ଧାନ କାଟି କ୍ରୟ କରିବାକୁ ସମବାୟ ସମିତି ସେକ୍ରେଟେରୀଙ୍କୁ କାଳେ ନିର୍ଦ୍ଦେଶ ଦେଇଥିଲେ । ରାଇସମିଲ କତ୍ତୃପକ୍ଷଙ୍କ ନିର୍ଦ୍ଦେଶ ମୁତାବକ ସମବାୟ ସଂସ୍ଥା ସେକ୍ରେଟାରୀ ଚାଷୀଙ୍କ ଠାରୁ ସିଧାସଳଖ କ୍ବିଣ୍ଟାଲ ପ୍ରତି ତିନିକିଲୋ ଲେଖାଏଁ ଧାନ କାଟିଥିଲେ । ଏହାକୁ ଚାଷୀମାନେ ତୀବ୍ର ବିରୋଧ କରି ଧାନ ବିକ୍ରି କରିବାକୁ ମନା କରି ଦେଇଥିଲେ । ଫଳରେ ଗାଙ୍ଗନଣ ସେବା ସମବାୟ ସମିତିରେ ଦୁଇଦିନ ହେଲା ଧାନ କ୍ରୟ ବନ୍ଦ ରହିବା ସହିତ ଖୋଲା ଆକାଶ ତଳେ ପାଞ୍ଚଶହ କ୍ବିଣ୍ଟାଲରୁ ଅଧିକ ଧାନ ପଡିରହିଛି ।
ସେପଟେ ଚାଷୀ ମାନେ ଧାନ ବିକ୍ରି କରିନପାରି ନିଜନିଜ ଧାନକୁ ଗଡ଼ାକରି ଜଗି ରହିଛନ୍ତି । ଇତି ମଧ୍ୟରେ ଦୁଇଦିନ ବିତିଯାଇଥିଲେ ସୁଦ୍ଧା ସମ୍ପୃକ୍ତ ମିଲ ମାଲିକ ସହିତ ଜିଲ୍ଲା ପ୍ରଶାସନର ସୁସମ୍ପର୍କ ଓ ସଲାସୁତରା ରହିଥିବାରୁ ପ୍ରଶାସନ ମଧ୍ୟ ଏଦିଗରେ କୌଣସି ପଦକ୍ଷେପ ନନେଇ ଚୁପ ବସିଥିବା ଚାଷୀକୁଳ ଅଭିଯୋଗ କରିଛନ୍ତି । ଏନେଇ ଚାଷୀଙ୍କ ମହଲରେ ତୀବ୍ର ଅସନ୍ତୋଷ ଦେଖାଦେଇଛି ।
ଆକାଶ ମେଘାଛନ୍ନ ଥିବାବେଳେ ଆଗାମୀ ଦିନରେ ବର୍ଷାର ସମ୍ଭାବନା ରହିଛି । ପୁଣି ଏ ଅଞ୍ଚଳରେ ହାତୀ ଉପଦ୍ରବ ଜାରି ରହିଥିବାରୁ ହାତୀ ଧାନ ଖାଇଯିବାର ମଧ୍ୟ ଭୟ ରହିଛି । ଏଭଳି ପରିସ୍ଥିତି ଚାଷୀଙ୍କ ପାଇଁ ଚିନ୍ତାର କାରଣ ହୋଇଛି । ଏଦିଗରେ ଜିଲ୍ଲା ପ୍ରଶାସନ ତୁରନ୍ତ ଦୃଷ୍ଟି ଦେବାକୁ ଚାଷୀକୂଳ ଦାବି କରିଛନ୍ତି ।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ
