ଦେବଗଡ଼: ସହରକୁ ବାହ୍ୟ ମଳମୁକ୍ତ ସହର ଭାବେ ଗଢି ତୋଳିବା ଲକ୍ଷ୍ୟରେ ପୌର ପରିଷଦ ପକ୍ଷରୁ ବିଭିନ୍ନ ୱାର୍ଡରେ ନିର୍ମାଣ କରାଯାଇଛି ଗୋଷ୍ଠୀ ଶୌଚାଳୟ ଓ ସ୍ନାନାଗାର । ମାତ୍ର ସମ୍ପୃକ୍ତ କର୍ତ୍ତୃପକ୍ଷଙ୍କ ଚରମ ଅବହେଳା କାରଣରୁ ମାସ ମାସ ଧରି ଏହି ଶୌଚାଳୟରେ ତାଲା ଝୁଲୁଥିବା ଘଟଣା ସାମନାକୁ ଆସିଛି । ଦେବଗଡ ପୌର ପରିଷଦ ଅନ୍ତର୍ଗତ ୧୦ ନମ୍ବର ୱାର୍ଡ (ଆରସିଏମଏସ ସାହି )ରେ ଦେଖିବାକୁ ମିଳିଛି ଏଭଳି ଘଟଣା ।
ଏଠାରେ ବସବାସ କରୁଥିବା ଲୋକଙ୍କ ସୁବିଧା ପାଇଁ ପୌର ପରିଷଦ ପକ୍ଷରୁ ଗତ ୨୦୧୭-୧୮ ମସିହାରେ ସରକାରଙ୍କ ଉନ୍ନତି ଯୋଜନା ମାଧ୍ୟମରେ ୬ ଲକ୍ଷରୁ ଊର୍ଦ୍ଧ୍ବ ଟଙ୍କା ବ୍ୟୟ କରାଯାଇ ନିର୍ମାଣ କରାଯାଇଥିଲା ଏକ 'ଆମ ଗୋଷ୍ଠୀ ଶୌଚାଳୟ ଓ ସ୍ନାନାଗାର '। ଏହି ଶୌଚାଳୟଟି ନିର୍ମାଣ ହେବା ପରେ ମାତ୍ର ଅଳ୍ପ କିଛିଦିନ ୱାର୍ଡବାସୀଙ୍କ ପାଇଁ ଖୋଲା ରହିଥିଲା। ୱାର୍ଡବାସୀ ଏହାକୁ ନିୟମିତ ବ୍ୟବହାର କରି ଆସୁଥିଲେ । ମାତ୍ର ଆଜକୁ ଦୀର୍ଘ ଏକ ବର୍ଷ ହେଲା ଏହି ଗୋଷ୍ଠୀ ଶୌଚାଳୟ ସ୍ନାନାଗାରରେ ଝୁଲୁଛି ତାଲା। ବିଭାଗୀୟ କର୍ତ୍ତୃପକ୍ଷଙ୍କ ଚରମ ଅବହେଳା କାରଣରୁ ଏହା ୱାର୍ଡବାସୀଙ୍କ ବ୍ୟବହାରରେ ନ ଆସି ପରିତ୍ୟକ୍ତ ଭାବେ ପଡି ରହିଛି । ଫଳରେ ଏନେଇ ୱାର୍ଡବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ଅନ୍ୟପକ୍ଷରେ, ୱାର୍ଡବାସୀ ପୂର୍ବରୁ ଶୌଚ ପାଇଁ ଯେଭଳି ପଦାକୁ ଯାଉଥିଲେ ବର୍ତ୍ତମାନ ମଧ୍ୟ ବାଧ୍ୟ ହୋଇ ସେଭଳି ପଦାକୁ ଯାଉଥିବା ପ୍ରକାଶ କରିଛନ୍ତି। ତେବେ କେଉଁ କାରଣରୁ ଏହି ଗୋଷ୍ଠୀ ଶୌଚାଳୟ ଓ ସ୍ନାନାଗାରଟି ଦୀର୍ଘ ସମୟ ଧରି ବନ୍ଦ ରହିଛି ଏହାର ସଠିକ କାରଣ କିଛି ଜଣାପଡୁନାହିଁ । ଏ ସମ୍ପର୍କରେ ଦେବଗଡ଼ ପୌର ନିର୍ବାହୀ ଅଧିକାରୀ କୁଞ୍ଜବନ ପ୍ରଧାନଙ୍କୁ ପଚରାଯିବାରୁ ସେ କିଛି କହିବାକୁ ମନା କରି ଦେଇଛନ୍ତି । ଏଥିରୁ ଦେବଗଡ଼ ସହରକୁ ସ୍ଵଚ୍ଛ ଓ ବାହ୍ୟ ମଳମୁକ୍ତ ରଖିବା ପାଇଁ ପୌର କର୍ତ୍ତୃପକ୍ଷ ଯେ କେଡେ ତତ୍ପର, ତାହା ସ୍ପଷ୍ଟ ପରିଲକ୍ଷିତ ହୋଇଛି।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ
