କଟକ/ଭୁବନେଶ୍ବର: ଜିଲ୍ଲାର ବଡ଼ SCB ମେଡିକାଲ ପାଥୋଲେଜି ବିଭାଗ ବିରୋଧରେ ସାଙ୍ଘାତିକ ଅଭିଯୋଗ । କ୍ୟାନସର ହୋଇନି ହେଲେ ଡାକ୍ତର ରୋଗୀଙ୍କ ଅଙ୍ଗ କାଟିବା ସହ କେମୋ ଦେଇଥିବା ନେଇ ଆସିଛି ସଙ୍ଗୀନ ଅଭିଯୋଗ । ଭୁଲ କ୍ୟାନସର ରିପୋର୍ଟ ପାଇଁ ଅଙ୍ଗ ହରାଇଛନ୍ତି ରୋଗୀ । ଏବେ ତାଙ୍କର ଅବସ୍ଥା ଶୋଚନୀୟ ରହିଥିବା ଜଣାପଡ଼ିଛି ।
SCB ମେଡିକାଲ ପାଥୋଲେଜି ବିଭାଗ ପକ୍ଷରୁ ଜଣେ ରୋଗୀଙ୍କୁ ଦିଆଯାଇଥିବା ବାୟପ୍ସି ରିପୋର୍ଟକୁ ଏହି ଚର୍ଚ୍ଚା ହେଉଛି । ପ୍ରଥମ ବାୟପ୍ସି ରିପୋର୍ଟରେ ରୋଗୀ କ୍ୟାନସରରେ ଆକ୍ରାନ୍ତ ହୋଇଥିବା ଦର୍ଶାଯାଇଥିବା ବେଳେ ଦ୍ବିତୀୟ ରିପୋର୍ଟରେ କ୍ୟାନସର ନଥିବା ଦର୍ଶାଯାଇଛି । ଫଳସ୍ବରୂପ ପୂର୍ବ ରିପୋର୍ଟ ଆଧାରେ ସମ୍ପୃକ୍ତ ରୋଗୀଙ୍କ କର୍କଟ ରୋଗର ଚିକିତ୍ସା ଆରମ୍ଭ ହୋଇ ଯାଇଥିବା ବେଳେ ଏବେ ଦ୍ବିତୀୟ ରିପୋର୍ଟକୁ ନେଇ ଚିନ୍ତାରେ ପଡ଼ିଛନ୍ତି ରୋଗୀଙ୍କ ପରିବାର ଲୋକେ ।
ସମ୍ପୃକ୍ତ ରୋଗୀଙ୍କ ବାୟପ୍ସି ରିପୋର୍ଟରେ କ୍ୟାନସର ଚିହ୍ନଟ ହୋଇଛି କିନ୍ତୁ ଦ୍ବିତୀୟ ରିପୋର୍ଟଟି ତୃଟିପୂର୍ଣ୍ଣ ବୋଲି କହିବା ସହ ଏହାକୁ ଟାଇପୋଗ୍ରାଫିକାଲ ଏରର ବୋଲି କହିଛନ୍ତି ଏସସିବି ପାଥେଲୋଜି ବିଭାଗ ମୁଖ୍ୟ । ତେବେ ଏହି ଅସୁବିଧାର ସମ୍ମୁଖୀନ ହୋଇଛନ୍ତି ଢେଙ୍କାନାଳ ଜିଲ୍ଲା କାମାକ୍ଷାନଗର ବାସିନ୍ଦା ପ୍ରଦୀପ୍ତା ଶତପଥୀ । ମହିଳାଙ୍କ ଛାତିରେ ମାଂସ ବଢିବା ପରେ ସେ ଏସସିବି ମେଡିକାଲରେ ଭର୍ତ୍ତି ହୋଇଥିଲେ । ତାଙ୍କର ସର୍ଜରୀ ବିଭାଗରେ ଅପରେସନ ମଧ୍ୟ ହୋଇଥିଲା । ଅପରେସନ ପରେ ମାଂସ ପରୀକ୍ଷା ପାଇଁ ପାଥୋଲୋଜିକୁ ପଠାଯାଇଥିଲା ।
ତେବେ ପୂର୍ବ ରିପୋର୍ଟ ଆଧାରରେ ପ୍ରଦୀପ୍ତାଙ୍କ ପରିବାର ଲୋକେ ତାଙ୍କୁ ଆଚାର୍ଯ୍ୟ ହରିହର କର୍କଟ ରୋଗ ଚିକିତ୍ସା କେନ୍ଦ୍ରରେ ଭର୍ତ୍ତି କରାଇବା ପରେ ତାଙ୍କର କର୍କଟ ଆକ୍ରନ୍ତ ହୋଇଥିବା ଅଙ୍ଗଟିକୁ ଅପରେସନ କରି କାଟି ଦିଆଯାଇଥିଲା । ଏହା ସହ ତାଙ୍କର କେମୋଥେରାପି ମଧ୍ୟ ଆରମ୍ଭ ହୋଇଯାଇଥିଲା । ତେବେ କୌଣସି କାରଣରୁ ପ୍ରଦୀପ୍ତାଙ୍କୁ ଚିକିତ୍ସା କରୁଥିବା ଡାକ୍ତର ତାଙ୍କ ବାୟପ୍ସିର ସ୍ଲାଇଡ୍ କୁ ପୁଣି ଥରେ ପରୀକ୍ଷା କରି ରିପୋର୍ଟ ଆଣିବାକୁ କହିଥିଲେ । କିନ୍ତୁ ଏଥର ସେହି ସ୍ଲାଇଡର ପରୀକ୍ଷା ରିପୋର୍ଟଟି ନେଗେଟିଭ ଆସିଛି ।
ଯାହାକୁ ନେଇ ପରିବାର ଲୋକ ଚିନ୍ତା ପ୍ରକଟ କରିବା ସହ ତାଙ୍କୁ ତୃଟିପୂର୍ଣ୍ଣ ରିପୋର୍ଟ ଦିଆଯାଇଥିବା ଅଭିଯୋଗ କରିଛନ୍ତି । ଯାହା ଆଜି ଗଣମାଧ୍ୟମରେ ପ୍ରକାଶ ପାଇଛି । ତେବେ ଏହି ଦିଗରେ ଖବର ପ୍ରସାରିତ ହେବା ପରେ ତତ୍ପରତା ପ୍ରକାଶ କରିଛନ୍ତି SCB କର୍ତ୍ତୃପକ୍ଷ । ପୁରା ଘଟଣା ସମ୍ପର୍କରେ ପାଥେଲାଜି ବିଭାଗକୁ ଲିଖିତ ଭାବେ ଏକ ରିପୋର୍ଟ ଦାଖଲ କରିବା ପାଇଁ ମଧ୍ୟ କୁହାଯାଇଛି । ଶୀଘ୍ର ଏହି ଦିଗରେ ରିପୋର୍ଟ ହସ୍ତଗତ ହେଲା ପରେ ତମାମ ଦିଗର ସତ୍ୟତା ସାମ୍ନାକୁ ଆସିବ ବୋଲି କହିଛନ୍ତି ଏସସିବି ମେଡିକାଲ ପ୍ରଶାସନିକ ଅଧିକାରୀ ।
ଇଟିଭି ଭାରତ, କଟକ ଓ ଭୁବନେଶ୍ବର
