କଟକ: ଆଉ ଦିନକ ପରେ ସାରା ଦେଶ ପାଳନ କରିବାକୁ ଯାଉଛି 77 ତମ ସ୍ବାଧୀନତା ଦିବସ । ଏହି ଜାତୀୟ ଉତ୍ସବ ପାଇଁ ସରକାରୀ ଓ ବେସରକାରୀ ସ୍ତରରେ ପ୍ରସ୍ତୁତି ଜାରି ରହିଛି । ସେହିପରି କଟକରେ ମଧ୍ୟ ସ୍ବାଧୀନତା ଦିବସ ପାଳନ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି । ପୋଲିସ ଓ ଜିଲ୍ଲା ପ୍ରଶାସନର ମିଳିତ ସହଯୋଗରେ ଆୟୋଜନ କରାଯାଉଥିବା ବେଳେ ଏଥିପାଇଁ ଆରମ୍ଭ ହୋଇଛି ପ୍ୟାରେଡ୍ ପୂର୍ବ ପ୍ରସ୍ତୁତି ।
ତେବେ ସ୍ୱାଧୀନତା ଦିବସ ପାଳନ ପାଇଁ ଆଉମାତ୍ର ଗୋଟିଏ ଦିନ ବାକି ରହିଛି । ଏଥିପାଇଁ ଜିଲ୍ଲା ସ୍ତରୀୟ ସ୍ୱାଧୀନତା ଦିବସକୁ ମହାସମାରୋହରେ ପାଳନ କରିବାକୁ କଟକ ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି । କଟକ ବାରବାଟୀ ଷ୍ଟାଡିୟମରେ ସ୍ୱାଧୀନତା ଦିବସକୁ ପାଳନ କରିବା ପାଇଁ ପ୍ୟାରେଡ଼ର ପୂର୍ବ ପ୍ରସ୍ତୁତି କରାଯାଇଥିଲା । ଏହି ପ୍ୟାରେଡରେ ୫୦ଟି ଗ୍ରୁପ ଭାଗ ନେବେ । ଏନସିସି ସିନିୟର ଡିଭିଜନ, ଏନସିସି ଜୁନିୟର ଡିଭିଜନ, ନାଭାଲ ଉଇଙ୍ଗ, ଏୟାରଫୋର୍ସ ଉଇଙ୍ଗ, ଏପିଆର ବ୍ରାସ ବ୍ୟାଣ୍ଡ, ସିକ୍ସଥ ବାଟାଲିଆନ ଓ ବିଭିନ୍ନ ସ୍କୁଲର ପିଲାମାନେ ଏହି ପରେଡ଼ରେ ଭାଗ ନେବେ ।
ଏଥିଲାଗି ବାରବାଟୀ ଷ୍ଟାଡିୟମରେ ଏହାର ପୂର୍ବ ପ୍ରସ୍ତୁତି ପ୍ୟାରେଡ଼ର ଅଭ୍ୟାସ କରାଯାଇଛି । ଏହି ଅଭ୍ୟାସ ତିନି ଦିନ ଧରି ଚାଲିଥିଲା। ସେହିପରି କଟକ ବାରବାଟୀ ଷ୍ଟାଡିୟମରେ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ପତାକା ଉତ୍ତୋଳନ କରିବାର କାର୍ଯ୍ୟକ୍ରମ ରହିଥିବା ନେଇ ପ୍ରଶାସନ ପକ୍ଷରୁ ସୂଚନା ମିଳିଛି । ତେବେ ଜିଲ୍ଲା ପ୍ରଶାସନ ସହ କମିଶନରେଟ୍ ପୋଲିସର ସହଯୋଗରେ ସ୍ଵାଧୀନତା ଦିବସ ପାଳନ କରାଯିବ । ଏଥିରେ ସ୍କୁଲ, ଏନସିସି ଛାତ୍ରଛାତ୍ରୀ ମାନଙ୍କ ସହ ପୋଲିସ ଫୋର୍ସ ମଧ୍ୟ ପରେଡରେ ସାମିଲ ହେବେ ।
ଅନ୍ୟପଟେ ପତାକା ଉତ୍ତୋଳନ ପାଇଁ ଉପସ୍ଥିତ ରହିବାକୁ ଥିବା ଅତିଥି ମାନଙ୍କ ପାଇଁ ବ୍ୟାପକ ବନ୍ଦୋବସ୍ତ କରାଯିବା ସହ କିଭଳି ଭାବରେ ସୁରୁଖୁରୁରେ ପାଳନ କରାଯିବ ତାହା ଉପରେ ବିଶେଷ ଗୁରୁତ୍ବ ଦିଆଯାଉଥିବା କଥା କହିଛନ୍ତି କଟକ ଡିସିପି ପିନାକ ମିଶ୍ର । ସ୍ଵାଧୀନତା ଦିବସକୁ ଶାନ୍ତି ଶୃଙ୍ଖଳାରେ ପାଳନ ସହ ଶୃଙ୍ଖଳିତ ଭାବେ ପ୍ୟାରେଡ୍ କରାଯିବ ସେ ନେଇ ସବୁ ପ୍ରକାରର ପୂର୍ବ ପ୍ରସ୍ତୁତିରେ ଲାଗି ପଡିଛନ୍ତି ଉଭୟ ଜିଲ୍ଲା ପ୍ରଶାସନ ଓ କମିଶନରେଟ୍ ପୋଲିସ୍ ।
ଇଟିଭି ଭାରତ, କଟକ
