କଟକ: ପ୍ରବଳ ବର୍ଷା ପବନରେ ବାଲିସାହି ଅସ୍ଥାୟୀ କ୍ୟାମ୍ପରେ ବ୍ୟାପକ କ୍ଷୟକ୍ଷତି ହେବା ଘଟଣାରେ ଜିଲାପାଳଙ୍କୁ ଭେଟିଲେ ବସ୍ତି ବାସିନ୍ଦା ଓ ସ୍ଥାନୀୟ ବିଧାୟକ । ତେବେ ଜିଲ୍ଲାପ୍ରାଶାସନ ଓ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ହୋଇଥିବା ଆଲୋଚନାରେ ନିଷ୍କର୍ସ ବାହାରିଥିବା ସୂଚନା ରହିଛି ।
ଆଜି ରାତିରେ ସ୍କୁଲ ଘରେ ରହିବେ ପ୍ରଭାବିତ ବାସିନ୍ଦା । ଖାଇବା ପିଇବା ଠୁ ଆରମ୍ଭ କରି ସମସ୍ତ ସୁବିଧା ସୁଯୋଗ ଯୋଗାଇ ଦିଆଯିବ । ଏହାସହ ଘର ନିର୍ମାଣ ହେଲା ପର୍ଯ୍ୟନ୍ତ ବାସୀନ୍ଦାଙ୍କ କୌଣସି ଅସୁବିଧା ହେବନି । ସେହିପରି ଘର ଭାଙ୍ଗିବା ପ୍ରସଙ୍ଗରେ ଆର୍ଥିକ ସହାୟତା ମିଲିବା ନେଇ ମଧ୍ୟ ସ୍ପଷ୍ଟ କରିଛନ୍ତି ଜିଲାପାଳ ଓ ବିଧାୟକ ।
ତେବେ ଏସସିବି ସମ୍ପ୍ରସାରଣ ପାଇଁ ଉଚ୍ଛେଦ ହୋଇଥିବା ବସ୍ତି ବାସୀନ୍ଦାଙ୍କୁ ଥଇଥାନ ପାଇଁ ବାଲି ସାହି ଅଞ୍ଚଳ ଚିହ୍ନଟ ହୋଇଥିଲା । କାଳ ବୈଶାଖୀରେ ଅସ୍ଥାୟୀ କ୍ୟାମ୍ପ ଭାଙ୍ଗି ଚୁରମାର ହୋଇଥିଲା । ଏହିକ୍ରମରେ ସ୍ଥାନୀୟ ବାସିନ୍ଦା ଉତ୍ତେଜିତ ହୋଇ ପୋଲିସ ଗାଡିକୁ ମଧ୍ୟ ଭାଙ୍ଗି ଥିଲେ ।
ଏହାପରେ ସିଏମସି କର୍ମଚାରୀ ମଧ୍ୟ ଆହତ ହେବାର ଦୃଶ୍ୟ ସମ୍ନାକୁ ଆସିଥିଲା । ତେବେ ଆଲୋଚନା ପରେ ବିବାଦରେ ପୂର୍ଣ୍ଣଚ୍ଛେଦ ପଡିଛି । ସବୁ ପ୍ରକାର ସହାୟତା ଯୋଗାଇ ଦେବା ପାଇଁ ଜିଲ୍ଲାପାଳ ପ୍ରତିଶ୍ରୁତି ଦେଇଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
