ଭୁବନେଶ୍ୱର/ଯାଜପୁର/ ଭବାନୀପାଟଣା/ ସମ୍ବଲପୁର: ବିଦାୟ ନେଇଛି ୨୦୨୪, ଆରମ୍ଭ ହୋଇଛି ନବବର୍ଷ ୨୦୨୫ । ଅନେକ ଆଶା ଓ ସମ୍ଭାବନାକୁ ନେଇ ଆସିଛି ନବବର୍ଷ । ଏହି ନବବର୍ଷକୁ ଅନେକ ଲୋକେ ଭଗବାନଙ୍କ ଆଶିଷରୁ ଆରମ୍ଭ କରିଛନ୍ତି । ଆଜି ସକାଳୁ ସକାଳୁ ବିଭିନ୍ନ ମନ୍ଦିରଗୁଡିକରେ ପ୍ରବଳ ଭିଡ ଦେଖିବାକୁ ମିଳିଥିଲା । ଅନ୍ୟପଟେ ଲୋକଙ୍କ ଭିଡକୁ ଦୃଷ୍ଟିରେ ରଖି ମନ୍ଦିରରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
ଲିଙ୍ଗରାଜ ମନ୍ଦିରରେ ଲମ୍ବା ଲାଇନ
ଆଜି ସକାଳୁ ସକାଳୁ ଭୁବନେଶ୍ୱରରେ ଅବସ୍ଥିତ ଲିଙ୍ଗରାଜ ମନ୍ଦିରରେ ଭକ୍ତଙ୍କ ଲମ୍ବା ଧାଡି ଦେଖିବାକୁ ମିଳିଥିଲା । ପ୍ରଭୁ ଲିଙ୍ଗରାଜଙ୍କ ଆଶିଷ ଭିକ୍ଷା କରି ଧାଡ଼ିବାନ୍ଧି ଶୃଙ୍ଖଳିତ ଭାବେ ଦର୍ଶନ କରିଛନ୍ତି ଶହ ଶହ ଶ୍ରଦ୍ଧାଳୁ । ଦୂରଦୂରାନ୍ତରୁ ଆସି ଭିଡରେ ଘଣ୍ଟା ଘଣ୍ଟା ଛିଡା ହୋଇଥିଲେ ମଧ୍ୟ ବାବାଙ୍କ ଦର୍ଶନ କରି ବେଶ ଖୁସି ଥିବା ମତବ୍ୟକ୍ତ କରିଛନ୍ତି ଶ୍ରଦ୍ଧାଳୁମାନେ ।
ମାଆ ମାଣିକେଶ୍ଵରୀଙ୍କ ଆଶୀର୍ବାଦରୁ ନୂଆବର୍ଷ ଆରମ୍ଭ
ଅନ୍ୟପଟେ କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମାଆ ମାଣିକେଶ୍ଵରୀଙ୍କ ମନ୍ଦିରରେ ମଧ୍ୟ ସକାଳୁ ସକାଳୁ ପ୍ରବଳ ଭିଡ଼ ଦେଖିବାକୁ ମିଳିଥିଲା । କଳାହାଣ୍ଡି ଜିଲ୍ଲାବାସୀଙ୍କ ସମେତ ବାହାର ଜିଲ୍ଲାରୁ ମଧ୍ୟ ଅନେକ ଶ୍ରଦ୍ଧାଳୁ ମାଆଙ୍କ ସାନ୍ନିଧ୍ୟ ପାଇବା ପାଇଁ ମାଣିକେଶ୍ଵରୀଙ୍କ ପୀଠ ଆସିଥିବା ଦେଖିବାକୁ ମିଳିଛି । ଅଧିଷ୍ଠାତ୍ରୀ ଦେବୀଙ୍କୁ ଦର୍ଶନ କରି ପରିବାରର ମଙ୍ଗଳ କାମନା କରିଛନ୍ତି ସଭିଏଁ । ନୂଆବର୍ଷ ପାଇଁ ଜିଲ୍ଲାର ବିଭିନ୍ନ ପର୍ଯ୍ୟଟନସ୍ଥଳୀ ମାନଙ୍କରେ ମଧ୍ୟ ଲୋକଙ୍କ ଭିଡ଼ ଜମିଛି । ସାଙ୍ଗସାଥି ପରିବାରଜନଙ୍କ ସହ ନୂଆ ବର୍ଷକୁ ବେଶ ଧୁମଧାମରେ ସ୍ୱାଗତ କରିଛନ୍ତି ଲୋକେ। ବିଭିନ୍ନ ପର୍ଯ୍ୟଟନସ୍ଥଳୀମାନଙ୍କରେ ଜମିଛି ଭୋଜି ଭାତର ଆସର । ନାଚଗୀତର ତାଳେ ତାଳେ ନବ ବର୍ଷକୁ ସ୍ବାଗତ କରିଛନ୍ତି ସଭିଏଁ ।
ଏନେଇ କଳାହାଣ୍ଡି ଜିଲ୍ଲାକୁ ଝାରସୁଗୁଡ଼ାରୁ ବୁଲିବାକୁ ଆସିଥିବା ପର୍ଯ୍ୟଟକ ସୋନାଲି ମହାନ୍ତି କହିଛନ୍ତି, " ଆମେ ଝାରସୁଗୁଡ଼ାରୁ ମା’ଙ୍କ ଦର୍ଶନ ପାଇଁ ଆସିଛୁ । ମାଆଙ୍କ ଆଶିଷ ଭିକ୍ଷା କରି ଆମେ ନୂତନ ବର୍ଷ ଆରମ୍ଭ କରିବୁ । ଏହା ସହିତ ଜିଲ୍ଳାର ସମସ୍ତେ ପର୍ଯ୍ୟଟନସ୍ଥଳୀ ମଧ୍ଯ ବୁଲିବୁ । ଆଉ ବିଶେଷ କରି ମାଆଙ୍କ ନିକଟରେ ଆମର ଅଗାଢ ବିଶ୍ୱାସ ରହିଛି ।"
ସେପଟ ଅନ୍ୟଜଣେ ଶ୍ରଦ୍ଧାଳୁ କଳ୍ପେଶ୍ୱର ପୁରୋହିତ କହିଛନ୍ତି, "ମାଆଙ୍କ ଆଶିଷ ଭିକ୍ଷା କରି ଆମେ ନୂତନ ବର୍ଷକୁ ସ୍ବାଗତ କରିଛୁ । ମାଆଙ୍କ ଉପରେ ଆମର ବହୁତ ବିଶ୍ବାସ ଓ ଭରସା ରହିଛି । ପରିବାରର ମଙ୍ଗଳ ମନାସି ଆଜି ନୂତନ ବର୍ଷ ପାଳନ କରୁଛୁ ।"
ଏହାମଧ୍ୟ ପଢନ୍ତୁ... ଜଗା ଦର୍ଶନ ସହ ନୂଆବର୍ଷ ଆରମ୍ଭ, ଜନସମୁଦ୍ର ଶ୍ରୀକ୍ଷେତ୍ର ବିଦାୟ ନେଲା 2024, ଜିରୋ-ନାଇଟ ସେଲିବ୍ରେସନରେ ଝୁମିଲା ରାଜଧାନୀ 2025କୁ ସ୍ୱାଗତ କଲେ ଓଲିଉଡ଼ ସେଲିବ୍ରିଟି, 2024କୁ ଏମିତି ଦେଲେ ବିଦାୟ |
ବିରଜା ମନ୍ଦିରରେ ଭକ୍ତଙ୍କ ଭିଡ
ଅନ୍ୟପଟେ ଯାଜପୁରର ଅଧିଷ୍ଠାତ୍ରୀ ଦେବୀ ମା’ ବିରଜାଙ୍କ ଆଶିଷ ଲାଭ ଲାଗି ଶ୍ରଦ୍ଧାଳୁଙ୍କ ଲମ୍ବା ଲାଇନ ଦେଖିବାକୁ ମିଳିଛି । ନୂତନ ବର୍ଷରେ ନିଜ ପରିବାରର ମଙ୍ଗଳ କାମନା କରିଛନ୍ତି ଶ୍ରଦ୍ଧାଳୁ ।
ସମଲେଶ୍ୱରୀଙ୍କ ପୀଠରେ ହଜାର ହଜାର ଭକ୍ତଙ୍କ ସମାଗମ
ନବବର୍ଷର ପ୍ରଥମ ଦିନରେ ସମଲେଶ୍ୱରୀଙ୍କ ମନ୍ଦିରର ଜମିଲା ଭକ୍ତ ଶ୍ରଦ୍ଧାଳୁଙ୍କ ଭିଡ଼ । ଆଜି ସକାଳ 5ଟା 30ରେ ପାରମ୍ପରିକ ରୀତିନୀତି ପରେ ମାଙ୍କ ମଙ୍ଗଳ ଆଳତୀ ହୋଇଥିଲା l ସକାଳ 6 ଟାରୁ ଭକ୍ତଙ୍କ ଦର୍ଶନ ପାଇଁ ମାଙ୍କ ମନ୍ଦିରର ମୁଖ୍ୟଦ୍ଵାର ଖୋଲା ଯାଇଥିଲା l ମା’ଙ୍କ ଦର୍ଶନ କରି ନୂଆବର୍ଷର ଆରମ୍ଭ କରିଛନ୍ତି ହଜାର ହଜାର ଭକ୍ତ ।
ଅନ୍ୟପଟେ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ଆଜିର ଗହଳିକୁ ନଜରରେ ରଖି ସ୍ୱତନ୍ତ୍ର ପାର୍କିଂର ବ୍ୟବସ୍ଥା ସହ ଟ୍ରାଫିକ ପରିଚାଳନା କରାଯାଇଥିଲା l ଭକ୍ତଙ୍କ ପାଇଁ ଧାଡି ଦର୍ଶନର ବ୍ୟବସ୍ଥା କରାଯାଇଥିଲା l ଆଜି ସମଲେଶ୍ୱରୀ ପୀଠରେ ଓଡ଼ିଶା, ଝାଡଖଣ୍ଡ, ବିହାର, ମହାରାଷ୍ଟ୍ର ସହ ଦକ୍ଷିଣ ଭାରତର ଶ୍ରଦ୍ଧାଳୁ ଆସିଥିବା ଦେଖିବାକୁ ମିଳିଥିଲା l ଶ୍ରଦ୍ଧାଳୁଙ୍କ ପାଇଁ ମନ୍ଦିର ବାହାରେ ଭୋଗ ଓ ପାନୀୟ ଜଳର ବ୍ୟବସ୍ଥା କରାଯାଇଛି l
ଇଟିଭି ଭାରତ, ଭୁବନେଶ୍ୱର/ଯାଜପୁର/ଭବାନୀପାଟଣା/ ସମ୍ବଲପୁର
