କଟକ: ପୋଲିସ ହାତରେ କୁଖ୍ୟାତ ମୋବାଇଲ ଲୁଟେରା । ନୂଆ କୌଶଳ ବଳରେ ଦାମୀ ଦାମୀ ମୋବାଇଲ ଚୋରି କରି ପୋଲିସକୁ ଦେଉଥିଲା ଚକମା । ଶେଷରେ ଲୁଟେରା ହେମନ୍ତ ହାତରେ ପଡିଛି ହ୍ୟାଣ୍ଡକପ ।
ସୂଚନା ଅନୁସାରେ ଗତ 20 ତାରିଖରେ ପ୍ରଶାନ୍ତ କୁମାର ବଳ ନାମକ ବ୍ୟକ୍ତି ପୁଅ ଦେହ ଖରାପ ହେବାରୁ ତାକୁ କଟକ ଶିଶୁ ଭବନ ନେଇ ଆସିଥିଲେ । ତେବେ ତାଙ୍କ ମୋବାଇଲରେ ଚାର୍ଜ ନଥିବାରୁ ସେ ଶିଶୁ ଭବନ କାର୍ଯ୍ୟାଳୟ ନିକଟରେ ଫୋନ ଚାର୍ଜରେ ବସାଇଥିଲେ । ଏବଂ ସେହି ସ୍ଥାନରେ ପୂର୍ବରୁ ଆଉ ଜଣେ ବ୍ୟକ୍ତି ମଧ୍ୟ ଫୋନ ଚାର୍ଜରେ ବସାଇଥିଲେ । ହେଲେ ସେହି ଅଜଣା ବ୍ୟକ୍ତି ହିଁ ମୋବାଇଲ ଲୁଟେରା ବୋଲି ସେ ଜାଣି ନଥିଲେ ।
ନିଜର ମୋବାଇଲକୁ ଚାର୍ଜ କରିବା ବାହାନାରେ ପ୍ରଶାନ୍ତ ବଳଙ୍କ ମୋବାଇଲକୁ ଲୁଟ କରିଥିଲା ହେମନ୍ତ । ତେବେ ଖୋଜାଖୋଜି ପରେ ମୋବାଇଲ ନମିଳିବାରୁ ସ୍ଥାନୀୟ ଲାଲବାଗ ଥାନାରେ ଏତେଲା ମଧ୍ୟ ହୋଇଥିଲା । ପରିଶେଷରେ ଗତକାଲି(ଶନିବାର) ପୋଲିସ ହାତରେ ଧରାପଡ଼ି କୋର୍ଟ ଚାଲାଣ ହୋଇଛି କୁଖ୍ୟାତ ମୋବାଇଲ ଲୁଟେରା ହେମନ୍ତ ପରିଡା । ଗିରଫ ସମୟରେ 19 ହଜାର ରୁ ଉର୍ଦ୍ଧ୍ବ ଟଙ୍କା ଓ 16 ଦାମୀ ମୋବାଇଲ ମଧ୍ୟ ଜବତ କରିଛି ପୋଲିସ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
