କଟକ: କିନ୍ନର ଖେଳୁଛି ରକ୍ତର ହୋଲି । ଗୋଟିଏ ପରେ ଗୋଟିଏ କରୁଛି ମର୍ଡର । ନିଜର ପ୍ରେତିଶୋଧ ନେବା ଉଦ୍ଦେଶ୍ୟରେ ଏପରି ଆଚରଣ କରୁଛି କିନ୍ନର । ଏହା କୌଣସି ରିଅଲ କ୍ରାଇମ ନୁହେଁ ବରଂ ରିଲ । ଫିଲ୍ମ ଫ୍ରାଇଡେରେ ରିଲିଜ ହୋଇଯାଇଛି ନୂଆ ଓଡ଼ିଆ ଫିଲ୍ମ 'ନାରୀ ନୁହେଁ ତୁ ଅର୍ଦ୍ଧନାରୀ' । ସମାଜରେ କିନ୍ନରମାନଙ୍କ ପ୍ରତି ହେଉଥିବା ଅତ୍ୟାଚାରକୁ ଫିଲ୍ମ ମାଧ୍ୟମରେ ଦର୍ଶାଯାଇଛି ।
କଟକ ସ୍ଥିତ ବୃନ୍ଦାବନ ପ୍ରେକ୍ଷାଳୟରେ ଶୁକ୍ରବାର ଚଳଚ୍ଚିତ୍ରର ପ୍ରିମିୟର ହୋଇଛି । ଫିଲ୍ମରେ ଦୁଇଜଣ ଅଭିନେତ୍ରୀଙ୍କ ସହ ଦୁଇଜଣ ଅଭିନେତା ନଜର ଆସିଛନ୍ତି । ମୁଖ୍ୟ ଚରିତ୍ରରେ ରୋଶନ ନନ୍ଦ ଅଭିନୟ କରିଥିବା ବେଳେ ନାୟିକା ଭାବେ ନବଗତା ପାୟଲ ଏବଂ ଲକ୍ଷ୍ମୀପ୍ରିୟା ନଜର ଆସିଛନ୍ତି । ସେହିପରି ସମ୍ବିତ କୁମାର ସାହୁ କିନ୍ନର ଭୂମିକାରେ ଅଭିନୟ କରିଛନ୍ତି । ରୋଶନ ଜଣେ ପୋଲିସ ଚରିତ୍ରରେ ନଜର ଆସିଛନ୍ତି । ସେହିପରି ଦୁଇ ନବଗତା ଅଭିନେତ୍ରୀଙ୍କ ଦମଦାର ରୋଲ ଦେଖିବାକୁ ମିଳିଛି ଏହି ଫିଲ୍ମରେ । ତେବେ ଉଭୟଙ୍କ ଚରିତ୍ରକୁ ନେଇ ଦର୍ଶକ ବେଶ ପସନ୍ଦ କରିବେ ବୋଲି ଫିଲ୍ମର ଟିମ ଆଶା ରଖିଛି । ଚନ୍ଦ୍ରାବତୀ ଭିଜନ ନିବେଦିତ ଏହି ଫିଲ୍ମର ସବୁଠୁ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଛନ୍ତି ସମ୍ବିତ । ସେ ଏହି ଫିଲ୍ମର କାହାଣୀକୁ ଲେଖିଥିବା ବେଳେ ଜଣେ କିନ୍ନର ଚରିତ୍ରରେ ନଜର ଆସିଛନ୍ତି । ସମାଜରେ ଜଣେ କିନ୍ନର କେଉଁ କେଉଁ ସମସ୍ୟା ଭୋଗୁଛନ୍ତି, ତାହା ଏଠାରେ ଦର୍ଶାଯାଇଛି ।
ଅନ୍ୟ କଳାକାରଙ୍କ ମଧ୍ୟରେ ବିରେନ ମିଶ୍ର, ହରିହର ମହାପାତ୍ର, ଅସିତ ପତି, ଯାତ୍ରା ଜଗତର ଆକ୍ସନ ହିରୋ ସୁରେଶ ପଣ୍ଡା, ପପୁ ପଣ୍ଡାଙ୍କ ସମେତ ବହୁ କଳାକାର ଅଭିନୟ କରିଛନ୍ତି । ଫିଲ୍ମର ସୁଟିଂ ରାଜ୍ୟର ବିଭିନ୍ନ ସ୍ଥାନରେ ହୋଇଥିବା ବେଳେ ଏଥିରେ ୫ଟି ଗୀତ ରହିଛି । ଶ୍ରୀନିବାସ ବିଶ୍ୱାଳ ସଙ୍ଗୀତକୁ ସଜେଇଛନ୍ତି । ସେହିପରି ପ୍ରଯୋଜନା ଦାୟିତ୍ୱ ତୁଳାଇଛନ୍ତି ସଞ୍ଜୟ ସାହୁ । ସମ୍ବିତ ସାହୁ କାହାଣୀ ଲେଖିଥିବା ବେଳେ ଚିତ୍ରନାଟ୍ୟ ଏବଂ ନିର୍ଦ୍ଦେଶନା ଭାର ସମ୍ଭାଳିଛନ୍ତି ମାନସ ସାହୁ । ତେବେ ସମାଜକୁ ବାର୍ତ୍ତା ଦେଇଥିବା ଏହି ଫିଲ୍ମକୁ ଦର୍ଶକ ନିଶ୍ଚିତ ପସନ୍ଦ କରିବେ ବୋଲି ଆଶା ରଖିଛି ପୁରା ୟୁନିଟ । ଏହିଭଳି ଫିଲ୍ମ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବ । ତେଣୁ ଆଗମୀ ଦିନରେ ଏଭଳି ଅନେକ ଫିଲ୍ମ ଆସିବ ବୋଲି ପ୍ରଯୋଜକ କହିଛନ୍ତି ।
ଇଟିଭି ଭାରତ, କଟକ
