କଟକ: ପରଲୋକରେ ଓଲିଉଡ୍ ଜଗତର ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ସ୍ବରୂପ ନାୟକ । ସେ ଦୀର୍ଘ ବର୍ଷ ଧରି ଲକୋଙ୍କୁ ନିଜ ଗୀତରେ ମତୁଆଲା କରିଆସୁଥିବା ବେଳେ ଆଜି ସେ ସ୍ବର ନୀରବି ଯାଇଛି । ତାଙ୍କ ଦେହାନ୍ତରେ ପରିବାର ଏବଂ ଇଣ୍ଡଷ୍ଟ୍ରିରେ ଶୋକାକୁଳ ପରିବେଶ ରହିଛି । ଏହାରି ମଧ୍ୟରେ ସ୍ବରୂପ ନାୟକଙ୍କ ଏକ ଭିଡିଓ ସାମ୍ନାକୁ ଆସିଛି । ଯେଉଁଥିରେ ସେ ଅସୁସ୍ଥ ଥିବା ବେଳେ ବି ସଙ୍ଗୀତକୁ ଭୁଲି ପାରିନଥିଲେ । ତାଙ୍କର ଏହି ଶେଷ ଗୀତ ଏବେ ସମସ୍ତଙ୍କୁ ବେଶ ଭାବପ୍ରବଣ କରିଛି ।
ସ୍ୱରୂପ ନାୟକଙ୍କ ଶେଷ ଗୀତ: ସ୍ୱରୂପ ନାୟକ ଦୀର୍ଘ ଦିନ ଧରି ଗଳା କର୍କଟ ରୋଗରେ ପୀଡ଼ିତ ଥିଲେ । ଅସୁସ୍ଥତା କାରଣରୁ ତାଙ୍କୁ କଟକର ଏକ ଘରୋଇ ମେଡିକାଲରେ ଭର୍ତ୍ତି କରାଯାଇଥିଲା । ଏହି ସମୟରେ ମେଡିକାଲ ବେଡରେ ଥିବା ବେଳେ ବି ସେ ତାଙ୍କ ଗୀତ ଗାଇବା ଅଭ୍ୟାସ ଜାରି ରଖିଥିଲେ । ସେ ତାଙ୍କ କଣ୍ଠରେ ସୁନ୍ଦର ଭଜନ ଗୀତ ଗାଇଥିଲେ । "ତୋତେ କେହି ନ ଡାକନ୍ତି ସୁଖରେ... ସଭିଏଁ ଡାକନ୍ତି ଦୁଃଖରେ... ତୁ ବିପଦ ବେଳର ବନ୍ଧୁରେ... ତୁ ଆପଦ କରୁଣା ସିନ୍ଧୁରେ.... ।" ପରେ ସେ ଚିକିତ୍ସାଧୀନ ଅବସ୍ଥାରେ ଅକ୍ଟୋବର ୨୭ ତାରିଖ (ଶୁକ୍ରବାର) ଶେଷ ନିଃଶ୍ବାସ ତ୍ୟାଗ କରିଥିଲେ । ତେବେ ତାଙ୍କର ଏହି ସୁନ୍ଦର ଶେଷ ଗୀତଟି ଭାଇରାଲ ହେଉଥିବା ବେଳେ ସମସ୍ତଙ୍କୁ ବେଶ ଭାବବିହ୍ବଳ କରିଛି ।
ସୂଚନା ଅନୁସାରେ, ୧୯୪୭ ଫେବୃଆରୀ ୮ ତାରିଖରେ କଟକରେ ଜନ୍ମଗ୍ରହଣ କରିଥିବା ସ୍ବରୂପ ନାୟକ ଅକ୍ଟୋବର ୨୭ ତାରିଖ ୨୦୨୩ରେ ଇହଧାମ ତ୍ୟାଗ କରିଥିଲେ । ପରେ ୨୮ ତାରିଖରେ କଟକ ସ୍ଥିତ ସତି ଚୌରା ମହା ଶ୍ମଶାନରେ ତାଙ୍କ ଶେଷକୃତ୍ୟ ସମ୍ପନ୍ନ ହୋଇଥିଲା । ମୃତ୍ୟୁ ବେଳକୁ ତାଙ୍କୁ ୭୬ବର୍ଷ ହୋଇଥିଲା । ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଅନ୍ତିମ ସଂସ୍କାର ସମ୍ପନ୍ନ ହୋଇଥିଲା ।
ଏହା ମଧ୍ୟ ପଢନ୍ତୁ: ଇହ ରାଇଜରୁ ଉଭେଇଗଲେ ସ୍ବରୂପ, ଶୋକାକୁଳ ପରିବେଶରେ ଶେଷକୃତ୍ୟ ସମ୍ପନ୍ନ
ସ୍ବରୂପ ନାୟକ ଜଣେ ଓଡ଼ିଆ କଥାଚିତ୍ର ସଙ୍ଗୀତକାର, ଗୀତିକାର, ପ୍ରଚ୍ଛଦପଟ୍ଟ ଗାୟକ ଓ ଅଭିନେତା ଭାବେ ସେ ଥିଲେ ବେଶ ଜଣାଶୁଣା । ସେ ୪୦ରୁ ଅଧିକ ଓଡ଼ିଆ ଚଳଚ୍ଚିତ୍ରରେ ସଙ୍ଗୀତ ନିର୍ଦ୍ଦେଶନା ଦେବା ସହ ୩୦ଟି ଚଳଚ୍ଚିତ୍ର ପାଇଁ ଗୀତ ରଚନା, ୬ଟିରେ ପ୍ରଚ୍ଛଦପଟ୍ଟ କଣ୍ଠଶିଳ୍ପୀ ଓ ୬ଟି ଚଳଚ୍ଚିତ୍ରରେ ଅଭିନୟ ବି କରିଥିଲେ । ତେବେ ଆଜି ତାଙ୍କ ଦେହାନ୍ତରେ ଓଡ଼ିଆ ସିନେ ଜଗତରେ ଏକ ଶୂନ୍ୟସ୍ଥାନ ସୃଷ୍ଟି ହୋଇଛି । ସ୍ବରୂପ ଆମ ଗହଣରେ ନାହାଁନ୍ତି ସତ ହେଲେ ତାଙ୍କର ଗୀତ ମାଧ୍ୟମରେ ସେ ସବୁଦିନ ପାଇଁ ଓଡ଼ିଆମାନଙ୍କ ହୃଦୟରେ ରହିବେ ।
ଇଟିଭି ଭାରତ, କଟକ
