କଟକ: ଜଗତସିଂହପୁର ଜିଲ୍ଲାର ନାଉଗାଁ ଥାନା ଅନ୍ତର୍ଗତ ତେଣ୍ଟାଲ ଗ୍ରାମର ଦଳିତ ଝିଅସହ ଦୁଷ୍କର୍ମ ଘଟାଇଥିବା ଅପରାଧିକୁ ଥାନା ଅଧିକାରୀ ସହଯୋଗ କରିଥିବା ଅଭିଯୋଗ । ଉକ୍ତ ଅଧିକାରୀକୁ ବହିଷ୍କାର ଓ ଗିରଫ ଦାବି ନେଇ ଗୁରୁବାର ପରିବାର ଲୋକେ ପୋଲିସ ଡ଼ିଜିଙ୍କୁ ଭେଟି ସ୍ମାରକପତ୍ର ପ୍ରଦାନ କରିଛନ୍ତି ।
ପରିବାର ଲୋକଙ୍କର ଅଭିଯୋଗ ଅନୁଯାୟୀ ପୂର୍ବରୁ ସେହି ଗ୍ରାମର ଦୀପକ ବେହୁରା ନାମକ ଜଣେ ଯୁବକ ତାଙ୍କର ଝିଅଙ୍କୁ ଦୀର୍ଘ ୩ ବର୍ଷ ହେବ ଜବରଦସ୍ତ ଦୁଷ୍କର୍ମ କରି ଆସୁଥିଲା । ପ୍ରତିବାଦ କଲେ ମାରିଦେବାର ଧମକ ମଧ୍ୟ ଦେଉଥିଲା । ଶେଷରେ ପରିବାର ଲୋକେ ଅତିଷ୍ଠ ହୋଇ ଗତ ଜୁନ ୮ ତାରିଖରେ ନାଉଗାଁ ଥାନାରେ ଅଭିଯୋଗ କରିଥିଲେ। ହେଲେ ଥାନା ପୋଲିସ ତାଙ୍କ କଥା ନଶୁଣି ବିଦା କରି ଥାନା ବାହାରକୁ ଯିବାକୁ ଧମକ ଦେଇଥିଲେ ।
ପୁଣି କିଛି ମାସ ପରେ ଅର୍ଥାତ ନଭେମ୍ବର ୭ ତାରିଖରେ ତାଙ୍କ ଝିଅ ସହ ଖରାପ କାର୍ଯ୍ୟ କରିବା ପରେ ତାଙ୍କର ଉଲଗ୍ନ ଫଟୋକୁ କାନ୍ଥରେ ମାରି ବଦନାମ କରାଇଥିଲେ । ଯାହା ଫଳରେ ଉକ୍ତ ପୀଡିତା ଆତ୍ମହତ୍ୟା କରିଥିଲେ । ପରେ ପରିବାର ଲୋକେ କେସ କରିଥିଲେ ସୁଦ୍ଧା ପୋଲିସ କୌଣସି ଦୁଷ୍ଟାନ୍ତ ପଦକ୍ଷେପ ନେଇନଥିଲା । ପରେ ଏହି ଘଟଣା ସବୁଆଡେ ପ୍ରଘଟ ହେବା ପରେ ପୋଲିସ ଆସାମୀକୁ ଗିରଫ କରିଥିଲା ।
ଏହି ଘଟଣାରେ ପୋଲିସ ଉକ୍ତ ଅପରାଧିକୁ ଘଣ୍ଟ ଘୋଡାଇବା ଅଭିଯୋଗ କରିଛନ୍ତି ପରିବାର ଲୋକେ । ପୋଲିସ ଯଦି ଆଗରୁ ଉକ୍ତ ଯୁବକ ବିରୁଦ୍ଧରେ ପଦକ୍ଷେପ ଗ୍ରହଣ କରିଥାନ୍ତା, ତେବେ ତାଙ୍କର ତାଙ୍କର ଝିଅ ବଞ୍ଚିଥାନ୍ତା ବୋଲି ପରିବାର ଲୋକେ ଅଭିଯୋଗ କରିଛନ୍ତି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
