କଟକ: ଦୀପାବଳୀ ପୂର୍ବରୁ କମିଶନରେଟ ପୋଲିସର ବେଆଇନ ବାଣ କାରଖାନା ଉପରେ ଚଢାଉ । ଜଗତପୁର ଥାନା ଅଞ୍ଚଳରେ ଏକ ବେଆଇନ ବାଣ କାରଖାନାରେ ବଡ ଧରଣର ରେଡ କରାଯାଇଛି । ଚଢାଉ ବେଳେ ବିପୁଳ ପରିମାଣର ବାଣ, ବିସ୍ଫୋରକ,ଲୁହାଗୁଣ୍ଡ, ବାରୁଦ ଆଦି ଜବତ କରିଛି କମିଶନରେଟ ପୋଲିସ । ଯାହାର ଆନୁମାନିକ ମୂଲ୍ୟ ପ୍ରାୟ 50 ଲକ୍ଷ ହେବ ବୋଲି ଜଣାପଡିଛି ।
ଲକ୍ଷାଧିକ ଟଙ୍କାର ବାଣ ଜବତ, 12 ଗିରଫ
ଏହି ଘଟଣାରେ 12ଜଣଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା କହିଛନ୍ତି କଟକ ଡିସିପି । ସୂଚନା ଅନୁଯାୟୀ, ମହାଜନପୁର ଗାଁରେ ବେଆଇନ ବାଣ କାରଖାନା ଚାଲୁଥିବା ଜାଣି ରାତି ଅଧିଆ ଚଢାଉ କରିଥିଲା ପୋଲିସ । ଏହି ଚଢାଉରେ ୧୨ ପ୍ଲାଟୁନ ପୋଲିସ ଫୋର୍ସ ସହ ୧୦ ଅଫିସର ସାମିଲ ଥିଲେ ।
ଆଗକୁ ଆହୁରି ଏଭଳି ଚଢ଼ାଉ କରାଯିବ । ତେବେ ବାଣ ତିଆରି ପାଇଁ ସେମାନେ କେଉଁଠୁ ବିସ୍ଫୋରକ ପାଉଡର ଆଣି ବାଣ ପ୍ରସ୍ତୁତ କରୁଥିଲେ ତାହାର ତଦନ୍ତ କରାଯାଉଥିବା ଡିସିପି କହିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
