କଟକ: ରାଜ୍ୟବାସୀଙ୍କୁ କଲବଲ କରିବାରେ ଲାଗିଛି ଲଘୁଚାପଜନିତ ଲଗାଣ ବର୍ଷା । ଏମିତିରେ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇ ପଡିଥିବା ବେଳେ ଫୁଲିବାରେ ଲାଗିଛି ରାଜ୍ୟର ବିଭିନ୍ନ ନଦୀ । ମହାନଦୀରେ ମଧ୍ୟ ଜଳସ୍ତର ବୃଦ୍ଧି ପାଇ ଆଖପାଖ ଅଞ୍ଚଳରେ ସୃଷ୍ଟି ହୋଇଛି ବନ୍ୟା ପରିସ୍ଥିତି । ଫଳରେ ଭଟ୍ଟାରିକାରେ ପ୍ରବେଶ କରିଛି ବନ୍ୟାପାଣି । ଦେବୀଙ୍କ ପୀଠରେ ବନ୍ୟା ଜଳ ପ୍ରବେଶ କରିବା ଯଦିଓ ନୂଆ ଘଟଣା ନୁହେଁ । ତେବେ ଚଳିତବର୍ଷ ପୀଠ ନିକଟରେ ପହଞ୍ଚିଛି ପ୍ରଥମ ବନ୍ୟା ଜଳ ।
ସୂଚନା ଅନୁଯାୟୀ ବଡମ୍ବାର ଅଧିଷ୍ଠାତ୍ରୀ ଦେବୀ ମା’ ଭଟ୍ଟାରିକାଙ୍କ ମନ୍ଦିରରେ ଗୁରୁବାର ସକାଳେ ପ୍ରାୟ 4 ଫୁଟର ବନ୍ୟା ଜଳ ପ୍ରବେଶ କରିବା ଫଳରେ ମା’ଙ୍କ ପ୍ରତିମାକୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି । ଗତ ଦୁଇ ସପ୍ତାହ ଧରି ରାଜ୍ୟରେ ଲଘୁଚାପ ଜନିତ ଲଗାଣ ବର୍ଷା ସହ ହୀରାକୁଦର ଗେଟ ଖୋଲିବାରୁ ମହାନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଏମିତିରେ ମହାନଦୀ ଅବବାହିକାରେ ଥିବା ଭଟ୍ଟାରିକା ମନ୍ଦିରରେ ପ୍ରବେଶ କରିଛି ଚଳିତବର୍ଷର ପ୍ରଥମ ବନ୍ୟା ଜଳ ।
ଏପରି ସ୍ଥିତିକୁ ନଜରରେ ରଖି ମା’ଙ୍କ ପ୍ରତିମାକୁ ପାହାଡ ଉପରେ ଥିବା ବାତ୍ୟା ଆଶ୍ରୟସ୍ଥଳକୁ ସ୍ଥାନାନ୍ତର କରାଯାଇଛି । ସେଠାରେ ମା’ଙ୍କର ସମସ୍ତ ନୀତିକାନ୍ତି ସମାପନ କରାଯାଉଛି । ତେବେ ମହାନଦୀରେ 7 ଲକ୍ଷରୁ ଉର୍ଦ୍ଧ୍ବ କ୍ୟୁସେକ ଜଳ ପ୍ରବାହିତ ହେଲେ ମନ୍ଦିର ମଧ୍ୟରେ ବନ୍ୟା ଜଳ ପ୍ରବେଶ କରିଥାଏ ବୋଲି ସୂଚନା ରହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
