କଟକ: ଦିନକ ପରେ ପଞ୍ଚୁକ । ଧବଳେଶ୍ବର ପୀଠରେ ହଜାର ହଜାର ଭକ୍ତଙ୍କ ଭିଡ଼ ଜମିବ । କାରଣ ବିଶ୍ବାସ ରହିଛି ପଞ୍ଚୁକର ପାଞ୍ଚ ଦିନ ବାବାଙ୍କ ପାଖରେ ଯାହା ମାନସିକ କରାଯାଏ ତାହା ପୂରଣ ହୋଇଥାଏ । ତେବେ ଚଳିତବର୍ଷ ପଞ୍ଚୁକ ପାଇଁ ଜିଲ୍ଲାପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
ଝୁଲା ପୋଲ ସହ ଡଙ୍ଗା ସାହାଯ୍ୟରେ ଶ୍ରଦ୍ଧାଳୁ ଧବଳେଶ୍ବର ଶୈବପୀଠରେ ଦର୍ଶନ କରିବେ । ଏଥିପାଇଁ ଜିଲ୍ଲାପ୍ରଶାସନ ପକ୍ଷରୁ 10ଟି ଡଙ୍ଗାର ବ୍ୟବସ୍ଥା କରାଯାଇଛି । ଏସଆରସି ପକ୍ଷରୁ ବୋଟ ବ୍ୟବସ୍ଥା କରାଯାଇଛି । ଲାଇଫ ଜ୍ୟାକେଟ ପିନ୍ଧି ଶ୍ରଦ୍ଧାଳୁ ଧବଳେଶ୍ବର ପୀଠକୁ ଯାଇପାରିବେ । ଶୃଙ୍ଖଳିତ ଦର୍ଶନ ପାଇଁ ଜିଲ୍ଲାପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି।
ଭକ୍ତଙ୍କ ସୁରକ୍ଷିତ ଦର୍ଶନ ପାଇଁ ପୋଲିସପ କ୍ଷରୁ ମଧ୍ୟ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଆସନ୍ତା 8 ତାରିଖରୁ 12 ତାରିଖ ପର୍ଯ୍ୟନ୍ତ ଧବଳେଶ୍ବର ପୀଠରେ 20 ପ୍ଲାଟୁନ ପୋଲିସ ଫୋର୍ସ ମୁତୟନ କରାଯିବ । ସୁରକ୍ଷା ଦାୟିତ୍ବରେ 50 ଅଫିସର ରହିବେ । ସେହିପରି 3 ଅତିରିକ୍ତ ଏସ୍ପି, 10 ଡିଏସ୍ପି, 20 ଆଇଆଇସି ସୁରକ୍ଷାର ତଦାରଖ କରିବେ । ପାର୍କିଂ ବ୍ୟବସ୍ଥା ପାଇଁ 4ଟି ପାର୍କିଂ ସ୍ଥାନର ବ୍ୟବସ୍ଥା କରାଯାଇଛି । ୱାନ୍ ୱେ ଟ୍ରାଫିକ ବ୍ୟବସ୍ଥା ସହ ପ୍ରାୟ ଦେଢ଼ କିଲୋମିଟର ପର୍ଯ୍ୟନ୍ତ ଭକ୍ତଙ୍କୁ ଚାଲିବାକୁ ପଡିବ । ମଧୁସୂଦନ ସେତୁ ପାଖରୁ ଓ ଆଠଗଡ଼ ପଟୁ ସୁରକ୍ଷା ପାଇଁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । କମିଶନରେଟ ପୋଲିସର କିଛିଅଂଶ ଏହି ରାସ୍ତାରେ ଥିବାରୁ ସେମାନଙ୍କ ସହ ଯୋଗାଯୋଗ କରାଯାଇଥିବା କଟକ ଗ୍ରାମାଞ୍ଚଳ ଏସ୍ପି କହିଛନ୍ତି।
ଆଠଗଡ଼ର ଆରାଧ୍ୟ ଶ୍ରୀ ଧବଳେଶ୍ବରଙ୍କ ପୀଠକୁ ଯିବା ପାଇଁ ମହାନଦୀ ଉପରେ ନିର୍ମାଣ କରାଯାଇଥିବା ଝୁଲାପୋଲର କ୍ଷମତା କ୍ରମଶଃ ହ୍ରାସ ପାଉଛି । ଝୁଲାପୋଲରେ ଏକ ସମୟରେ 6 ଶହରୁ ଅଧିକ ଯାତ୍ରୀ ଗଲେ ପୋଲ ପ୍ରତି ବିପଦ ଆଶଙ୍କା ରହିଛି।
କଟକରୁ ନାରାୟଣ ସାହୁ, ଇଟିଭି ଭାରତ
