କଟକ: ଆଜି ଶ୍ରାବଣ ପ୍ରଥମ ସୋମବାର । ୨ ବର୍ଷ ପରେ ଜଳଲାଗି ପାଇଁ ଶୈବପୀଠରେ କାଉଡ଼ିଆଙ୍କ ଭିଡ଼ ଦେଖିବାକୁ ମିଳିଛି । ହଜାର ହଜାର ବୋଲବମ ଭକ୍ତ ଧବଳେଶ୍ବରଙ୍କ ପୀଠରେ ଭୋଳା ବାବାଙ୍କୁ ଜଳ ଲାଗି କରୁଛନ୍ତି । ଦେବଦେବ ମହାଦେବଙ୍କ ଉପରେ ପାଣି ଢାଳି ଶୁଭ ମନାସୁଛନ୍ତି କାଉଡ଼ିଆ । ଜଳଲାଗି କରିବା ପାଇଁ ପ୍ରଶାସନ ପକ୍ଷରୁ ଧବଳେଶ୍ବର ପୀଠରେ ବ୍ୟାପକ ବ୍ୟବସ୍ଥା କରାଯାଇଛି ।
କଳା ବଳଦକୁ ଧଳା କରିଥିବାରୁ ବାବାଙ୍କ ନାମ ଧବଳେଶ୍ବର ହୋଇଛି । ବିଶ୍ବାସ ରହିଛି ଧବଳେଶ୍ବରଙ୍କ ମସ୍ତକରେ ଜଳଲାଗି କଲେ କୋଟି ଜନ୍ମର ପୁଣ୍ୟ ମିଳିବା ସହିତ ମାନସିକ ଶାନ୍ତି ମିଳିଥାଏ । ସେଥିପାଇଁ ଓଡିଶାର କୋଣ ଅନୁକୋଣରୁ ଶ୍ରଦ୍ଧାଳୁ ମାନେ ପବିତ୍ର ପୀଠକୁ ଛୁଟି ଆସିଥାନ୍ତି । ଆଜି ରାତ୍ରି 2ଟାରୁ ବାବାଙ୍କ ପହଡ ଖୋଲାଯାଇ ରୀତିନୀତି ସମାପନ କରାଯାଇ ମଙ୍ଗଳା ଆଳତୀ ପରେ ସର୍ବସାଧାରଣ ଦର୍ଶନ ନିମନ୍ତେ ଦ୍ବାର ଫିଟା ଯାଇଥିଲା । କାଉଡିଆ ମାନେ ମନ୍ଦିର ବେଢାରେ ଥିବା ଶ୍ରାବଣୀ ଲିଙ୍ଗରେ ଜଳଲାଗି କରିଥିଲେ ।
ଶାନ୍ତିଶୃଙ୍ଖଳାର ସହ ଜଳଲାଗି ଓ ଦର୍ଶନ କରିବା ପାଇଁ ଦେବୋତ୍ତର ବିଭାଗ ଓ ପୋଲିସ ପ୍ରଶାସନ ପକ୍ଷରୁ ମନ୍ଦିର ବେଢା, ଝୁଲା ପୋଲ ଠାରେ ବ୍ୟାପକ ବ୍ୟବସ୍ଥା କରାଯାଇଛି । କୋଭିଡ ପାଇଁ ଦୁଇ ବର୍ଷ ହେବ କାଉଡ଼ିଆଙ୍କୁ ବାରଣ କରାଯାଇଥିବା ବେଳେ ଚଳିତବର୍ଷ ଅନୁମତି ମିଳିଥିବାରୁ କାଉଡିଆ ମାନଙ୍କ ମନରେ ବେଶ ଉତ୍ସହ ଦେଖା ଦେଇଛି।
ଇଟିଭି ଭାରତ, କଟକ
