କଟକ: ରାତି ପାହିଲେ ପ୍ରଥମ ପର୍ଯ୍ୟାୟ ତ୍ରିସ୍ତରୀୟ ନିର୍ବାଚନ । ଆସନ୍ତାକାଲି(ବୁଧବାର) କଟକ ଜିଲ୍ଲାର ୩ଟି ବ୍ଲକରେ ପ୍ରଥମ ପର୍ଯ୍ୟାୟ ମତଦାନ ହେବ । ମାହାଙ୍ଗା, ନରସିଂହପୁର ଓ ସଦର ବ୍ଲକର ମୋଟ ୧୪୫୧ ବୁଥ୍ରେ ମତଦାନ ହେବ । କେବଳ ମାହାଙ୍ଗାର ୫୨୩ଟି ବୁଥ୍ରେ ଆସନ୍ତାକାଲି ମତଦାନ ହେବ ।
ଜବାହରଲାଲ ନେହେରୁ କଲେଜରେ ହୋଇଥିବା ଡିସପରସଲ ସେଣ୍ଟରରୁ ପୋଲିଂ ପାର୍ଟି ନିଜ ନିଜର ବୁଥ ଅଭିମୁଖେ ଯାତ୍ରା କରିଛନ୍ତି । ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଅଧିକାଂଶ ବୁଥ୍ରେ ପୋଲିଂ ପାର୍ଟି ପହଞ୍ଚି ସାରିଛନ୍ତି । ଶାନ୍ତିଶୃଙ୍ଖଳାର ସହ ମତଦାନ ପାଇଁ ଜିଲ୍ଲା ପ୍ରଶାସନ ଓ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ତେବେ ଅତି ସମ୍ବେଦନଶୀଳ ବୁଥ୍ ଗୁଡ଼ିକରେ ଭିଡିଓଗ୍ରାଫି କରାଯିବ । ଏହାକୁ ନେଇ କଟକ ଉପଜିଲ୍ଲାପାଳ ସୂଚନା ଦେଇଛନ୍ତି ।
ନିର୍ବାଚନକୁ ସୁରୁଖୁରୁରେ ଶେଷ କରିବାକୁ ଜନସାଧାରଣଙ୍କଠାରୁ ବ୍ୟାପକ ସମର୍ଥନ ମିଳୁଛି । ତା ସହିତ ସମସ୍ତ ପ୍ରାର୍ଥୀ ମଧ୍ୟ ସହଯୋଗ କରୁଛନ୍ତି । କଟକରେ ନିର୍ବାଚନ ସୁରୁଖୁରୁରେ ଶେଷ ହେବା ନେଇ ଆଶାବାଦୀ ଅଛନ୍ତି କଟକ ଉପ ଜିଲ୍ଲାପାଳ ପ୍ରତାପ ବେଉରିଆ ।
କଟକରୁ ନାରାୟଣ ସାହୁ, ଇଟିଭି ଭାରତ