କଟକ: ଲକଡାଉନକୁ ମାସେରୁ ଅଧିକ ବିତିଲାଣି, ହେଲେ ମହାମାରୀ କୋରୋନାର ପ୍ରଭାବ ଥମିବାର ନା ଧରୁନି । ଫଳରେ ଆର୍ଥିକ ମାନ୍ଦାବସ୍ଥା ଭିତରକୁ ଠେଲି ହୋଇ ଯାଉଛି ସାରା ବିଶ୍ବ। ବିଶେଷ କରି ଏଥିରେ ପ୍ରଭାବିତ ହେଉଛନ୍ତି ସାଧାରଣ ବର୍ଗର ଲୋକେ। ଆଉ ଏଥିରୁ ବାଦ ପଡ଼ି ନାହାନ୍ତି କୁଲି ସମ୍ପ୍ରଦାୟ । ଟ୍ରେନ ଚକ ସହ ଅଟକିଯାଇଛି ଶତାଧିକ କୁଲିଙ୍କ ଜୀବନ ଜୀବିକା। ସଞ୍ଚୟ ତ ଦୂରର କଥା, ଏବେ ଭୋକ ଉପାସରେ ଦିନ କାଟୁଛନ୍ତି ଏହି ସମ୍ପ୍ରଦାୟ । କହିବାକୁ ଗଲେ ଲକଡାଉନରେ ଲକ ହୋଇଯାଇଛି ସେମାନଙ୍କ ଜୀବନ।
କୋରୋନା ଭୂତାଣୁ ବିଶ୍ୱରେ ମହାମାରୀ ରୂପ ନେବା ପରେ ଲକ ଡାଉନ ଯୋଗୁଁ ଭାରତୀୟ ରେଳବାଇର ଯାତ୍ରୀବାହୀ ସେବାକୁ ବନ୍ଦ କରାଯାଇଛି। ଫଳରେ ରୋଜଗାର ହରାଇଛନ୍ତି ହଜାର ହଜାର କୁଲି । ଯାତ୍ରୀଙ୍କ ମାଲକୁ କାନ୍ଧରେ ଏକାସାଙ୍ଗରେ ବୋହିବାର କଳା ଶିଖିଥିବା ଏହି କୁଲି ଏବେ ଭୋକ ଉପାସରେ ଦିନ କାଟୁଛନ୍ତି। କିଛି ନିଜ ନିଜ ଗାଁ କୁ ଫେରି ଯାଇଥିବାବେଳେ ଆଉ କିଛି ଫସି ରହିଛନ୍ତି ବିଭିନ୍ନ ଅଞ୍ଚଳରେ । ନାଁ ଏମାନଙ୍କ ପାଖରେ ଅଛି ରାସନ କାର୍ଡ ନାଁ କୌଣସି ଅନୁଦାନ । ପରିସ୍ଥିତି ଏମିତି କି ଦୁଇ ମୁଠା ଦାନା ନେବାକୁ ଏବେ ସଂଘର୍ଷ କରିବାକୁ ପଡୁଛି।
ପ୍ରତିଦିନ ଅନ୍ୟର ବୋଝ ଉଠାଇ ଜୀଵିକା ଉପାର୍ଜନ କରୁଥିବା ଏହି କୁଲିମାନେ ବର୍ତ୍ତମାନ ନିଜ ପରିବାରର ବୋଝ ଉଠେଇବା ପାଇଁ ଅସମର୍ଥ । ତେବେ ଯଦି ଏମିତି ପରିସ୍ଥିତି ଅଧିକ ଦିନ ଲାଗି ରହେ ଏମାନଙ୍କ ପରିବାର ଭୋକ ଉପାସରେ ମାରିବା ଛଡା ଅନ୍ୟ ଗତି ନାହିଁ । ଦୈନିକ ମଜୁରୀରେ ପେଟ ପୋଷୁଥିବା କୁଲି ମାନେ ଏବେ ସହରର ବିଭିନ୍ନ ସ୍ଥାନରେ ରହି ଲକଡାଉନ ଖୋଲିବା ଅପେକ୍ଷାରେ । କାରଣ ଯେପର୍ଯ୍ୟନ୍ତ ଯାତାୟତ ସ୍ୱାଭାବିକ ହୋଇନି ସେପର୍ଯ୍ୟନ୍ତ ସେମାନଙ୍କ ଜୀବନ ଜୀବିକା ପୁନଃ ସ୍ୱାଭାବିକ ହେବା ମୁସ୍କିଲ ।
କଟକରୁ ନାରାୟଣ ସାହୁ, ଇଟିଭି ଭାରତ
