କଟକ: ହାଇକୋର୍ଟର ଦ୍ବାରସ୍ଥ ହୋଇଛନ୍ତି ଦୁଇ ବିଜେପି ନେତା । ଛତ୍ରପୁର ଯୁବ ବିଜେଡି ନେତା ତଥା କର୍ପୋରେଟର ଲକ୍ଷ୍ମୀଦତ୍ତ ପ୍ରଧାନ ହତ୍ୟା ଘଟଣାରେ ବିଜେପିର ଦୁଇ ବରିଷ୍ଠ ନେତା ଗୋଲକ ମହାପାତ୍ର ଓ ଭୃଗୁ ବକ୍ସି ପାତ୍ରଙ୍କୁ ହାଜର ପାଇଁ ସମନ କରିଛି ଛତ୍ରପୁର ପୋଲିସ । ଗତକାଲି ଗୋଲକ ମହାପାତ୍ରଙ୍କୁ ହାଜର ପାଇଁ ନୋଟିସ ହୋଇଥିଲା । ହେଲେ ସ୍ବାସ୍ଥ୍ୟଗତ କାରଣ ଦର୍ଶାଇ ତାଙ୍କର ଦୁଇ ଓକିଲ ଥାନାରେ ପକ୍ଷ ରଖିଥିଲେ ।
ସେହିପରି ଆସନ୍ତାକାଲି(ଶନିବାର) ଭୃଗୁ ବକ୍ସି ପାତ୍ର ହାଜର ହେବାର ତାରିଖ ରହିଛି ।
ଲକ୍ଷ୍ମୀଦତ୍ତ ଛତ୍ରପୁର ଓ୍ବାର୍ଡ ନଂ 6ର ବିଜେଡି କାଉନସିଲର ଥିଲେ । ଗତ 16 ସେପ୍ଟେମ୍ବର 2017ରେ ଛାତ୍ର ସଂସଦ ନିର୍ବାଚନକୁ ନେଇ ଯୁବ ବିଜେଡି ନେତା ଲକ୍ଷ୍ମୀଦତ୍ତଙ୍କୁ ନିଜ ଘର ସମମ୍ମୁଖରେ ଅତି ବିଭତ୍ସ ଭାବେ ହତ୍ୟା କରାଯାଇଥିଲା । ଏହି ମାମଲାରେ ଏବେ ସୁଦ୍ଧା 19 ଜଣଙ୍କୁ ଗିରଫ କରିଛି ପୋଲିସ ।
ମୁଖ୍ୟ ଅଭିଯୁକ୍ତ ଗୋଲକ ମହାପାତ୍ରଙ୍କ ପରାମର୍ଶରେ ଉତ୍ତରାଖଣ୍ଡରେ ଯାଇ ଆତ୍ମଗୋପନ କରିଥିବା ଅଭିଯୋଗ ହୋଇଥିଲା । ଏମିତିକି ଅଭିଯୁକ୍ତ ହତ୍ୟାକାରୀ ଉତ୍ତରାଖଣ୍ଡରେ ଥିବାବେଳେ ଗୋଲକଙ୍କ ସହ ଯୋଗଯୋଗରେ ଥିବା ଅଭିଯୋଗ ହୋଇଥିଲା । ଯାହାର କଲ ରେକର୍ଡ ପୋଲିସ ପାଖରେ ଥିବା ସୂଚନା ରହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
