କଟକ: କିଛି ଦିନପରେ କଟକରୁ ପୁଣି ଜବତ ହେଲା ବ୍ରାଉନସୁଗାର । ସହରର ଗଡଗଡିଆ ଘାଟ ନିକଟରୁ 230 ଗ୍ରାମର ବ୍ରାଉନ ସୁଗାର୍ ଜବତ କରିବା ସହ ଜଣେ ବେପାରୀକୁ ଗିରଫ କରିଛି କେନ୍ଦ୍ରାଞ୍ଚଳ ଅବକାରୀ ବିଭାଗ । ତେବେ ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ 23 ଲକ୍ଷ ଟଙ୍କା ବୋଲି କହିଛି ଅବକାରୀ ବିଭାଗ । ଗିରଫ ହୋଇଥିବା ବ୍ୟକ୍ତି ବାଲେଶ୍ଵରର ହୋଇଥିବାବେଳେ ସେ ନିଜେ ଏହାକୁ ଆଣି ବେପାର କରୁଥିବା ଜଣାପଡିଛି । ଏଥିରେ ଅଧିକାଂଶ ଛାତ୍ରଛାତ୍ରୀଙ୍କୁ ଟାର୍ଗେଟ କରାଯାଉଥିଲା ବୋଲି ଜଣାପଡିଛି ।
ସୂଚନା ଅନୁସାରେ ନିଶା କାରବାର ଚାଲିଥିବା ନେଇ ବିଶେଷ ସୂତରୁ ଖବର ପାଇ ଚଢ଼ାଉ କରିଥିଲା କେନ୍ଦ୍ରାଞ୍ଚଳ ଅବକାରୀ ଗୁଇନ୍ଦା । ବାଲେଶ୍ଵରରୁ ଆସୁଥିବା ଏହି ନିଶାଦ୍ରବ୍ୟ କଟକ ଭାୟା ହୋଇ ଅନ୍ୟ ଜିଲ୍ଲାକୁ ଚାଲାଣ ହେଉଥିବା ଜାଣିବାକୁ ପାଇଛି ପୋଲିସ । ବାଲେଶ୍ବର, ଖୋର୍ଦ୍ଧା ପରେ ଏବେ କଟକରେ ଏପରି ନିଶା କାରବାର ବଢିବା ପୋଲିସର ଚିନ୍ତାକୁ ବଢାଇଛି । ଏବେ କଟକ ସହରରୁ ଗୋଟିଏ ପରେ ଗୋଟିଏ ବ୍ରାଉନ ସୁଗାର ବେପାରୀ ଧରା ପଡୁଥିବା ଘଟଣା ସାମ୍ନାକୁ ଆସିବାରେ ଲାଗିଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
