କଟକ: ରାଜ୍ୟରେ ବର୍ତ୍ତମାନ ଚର୍ଚ୍ଚାର ବିନ୍ଦୁ ପାଲଟିଛି ଅନୁଗୋଳ ଦୁଷ୍କର୍ମ ମାମଲା । ଗୋଟିଏ ପଟେ ନ୍ୟାୟ ଅପେକ୍ଷାରେ ପୀଡିତା ବଡ ମେଡିକାଲରେ ଚିକିତ୍ସିତ ହେଉଥିବା ବେଳେ ଅନ୍ୟପଟେ ଘଟଣାରେ ତ୍ବରିତ ପଦକ୍ଷେପ ନେବା ପାଇଁ ଚେତିଛନ୍ତି ସରକାର । ଏନେଇ ମଙ୍ଗଳବାର ମେଡିକାଲକୁ ଯାଇ ପୀଡିତାକୁ ଭେଟିଛନ୍ତି ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ କମିଶନ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ।
ସୂଚନା ଅନୁଯାୟୀ ଦୁଇ ଦିନ ତଳେ ଅନୁଗୋଳ ସହରରେ ଜଣେ 8 ବର୍ଷୀୟା ନାବାଳିକା ଦୁଷ୍କର୍ମର ଶିକାର ହୋଇଥିଲା । ପୀଡିତାର ବିଭିନ୍ନ ଡାକ୍ତରୀ ପରୀକ୍ଷା କରିବା ସହ ଚିକିତ୍ସା ପାଇଁ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା । ଘଟଣାରେ ପରିବାରବର୍ଗ ଓ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ନ୍ୟାୟ ଦାବିରେ ରାସ୍ତାକୁ ଓହ୍ଲାଇଥିବା ବେଳେ ପୀଡିତାର ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ କମିଶନ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ।
ସେ ପୀଡିତାର ସ୍ବାସ୍ଥ୍ୟାବସ୍ଥା ପରଖିବା ସହ ମେଡିକାଲ କର୍ତ୍ତୃପକ୍ଷଙ୍କ ସହ ଆଲୋଚନା ମଧ୍ୟ କରିଛନ୍ତି । ଯେପରି ନାବାଳିକାର ସ୍ବାସ୍ଥ୍ୟାବସ୍ଥାରେ ଶୀଘ୍ର ଉନ୍ନତି ଆସିବ ସେନେଇ ଭଲ ଚିକିତ୍ସା ଚାଲିଥିବା ସେ ପ୍ରକାଶ କରିଛନ୍ତି । ଏଥିସହ ଆଗ ଅପେକ୍ଷା ବର୍ତ୍ତମାନ ପୀଡିତାର ଅବସ୍ଥା ସ୍ଥିର ଥିବା ସେ କହିଛନ୍ତି ।
ସନ୍ଧ୍ୟାବତୀଙ୍କ କହିବା ଅନୁଯାୟୀ ନାବାଳିକାର ସମସ୍ତ ପ୍ରକାର ଡାକ୍ତରୀ ପରୀକ୍ଷା ସରିଛି । ଏଥିସହ ତାଙ୍କର ଅବସ୍ଥାରେ ସୁଧାର ମଧ୍ୟ ଦେଖିବାକୁ ମିଳୁଛି । ତେଣେ ପୋଲିସ ପାଖରେ ଦାୟର ହୋଇଥିବା ମାମଲା ଅନୁଯାୟୀ ତଦନ୍ତ ହେବ ଓ ଦୋଷୀ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
