କଟକ: ଦୀର୍ଘ 6 ଘଣ୍ଟା ପରେ ଟିଣ ଘରୁ ଉଦ୍ଧାର ହେଲା 3 ବର୍ଷର ଶିଶୁ । କଟକ ବିଡାନାସୀ ଥାନା ଅନ୍ତର୍ଗତ କୃଷକ ବଜାରରେ ଥିବା ଏକ ଟିଣ ଘରୁ ଶିଶୁକୁ ଉଦ୍ଧାର କରିଛି ଚାଇଲ୍ଡଲାଇନ ବିଭାଗ । ସୂଚନା ଅନୁଯାୟୀ, ଦିନ ୧୧ଟା ସମୟରେ ଏକ ବନ୍ଦ ଘରୁ ଜଣେ ଛୋଟ ପିଲାର କାନ୍ଦ ଶୁଣିବାକୁ ପାଇଥିଲେ ଜଣେ ସ୍ଥାନୀୟ ଅଟୋ ଡ୍ରାଇଭର । ଏ ବିଷୟରେ ସେ ତୁରନ୍ତ ଚାଇଲ୍ଡଲାଇନକୁ ଖବର ଦେଇଥିଲେ ।
ତେବେ ଖବରପାଇ ଚାଇଲ୍ଡଲାଇନ ଘଟଣାସ୍ଥଳରେ ପହଞ୍ଚି ପୋଲିସକୁ ଖବର ଦେଇଥିଲା । ଘରଟି ତାଲା ପଡିଥିବାରୁ ପୋଲିସ ଉପସ୍ଥିତିରେ ଘରର ତାଲା ଭାଙ୍ଗି ପିଲାଟିକୁ ଉଦ୍ଧାର କରିଥିଲେ ଚାଇଲ୍ଡଲାଇନ ସଦସ୍ୟ । ଏହା ପରେ ଶିଶୁଭବନରେ ପିଲାଟିର ସ୍ୱାସ୍ଥ୍ୟ ପରୀକ୍ଷା ହେବା ପରେ ଚାଇଲ୍ଡଲାଇନକୁ ହସ୍ତାନ୍ତର କରାଯାଇଥିଲା । ସ୍ଥାନୀୟ ଲୋକଙ୍କ କହିବାନୁସାରେ, ଶିଶୁଟିର ମାଆ ବାହାରକୁ କାମ କରିବାକୁ ଯାଉଥିବାରୁ ପିଲାଟିକୁ ଘରେ ବନ୍ଦ କରି ତାଲା ପକାଇ ପଳାଇ ଯାଇଥିଲା ।
ମାତ୍ର ଏ ପର୍ଯ୍ୟନ୍ତ ଶିଶୁଟିର ବାପା ମାଆଙ୍କ କୌଣସି ପରିଚୟ ମିଳିପାରିନାହିଁ । ତେବେ ପିଲାଟିକୁ ୫ ବର୍ଷରୁ କମ ବୟସ ହୋଇଥିବାରୁ ନିୟମ ଅନୁଯାୟୀ ତାକୁ ସତନ୍ତ୍ର ଆଡପସନ ଏଜେନ୍ସିରେ ଥଇଥାନ କରାଯିବ ବୋଲି ଚାଇଲ୍ଡଲାଇନ ସଦସ୍ୟ କହିଛନ୍ତି । ଶିଶୁର ବାପାମାଆଙ୍କ ପରିଚୟ ମିଳିବା ପରେ ଘଟଣା ବିଷୟରେ ଅନୁଧ୍ୟାନ କରାଯାଇ ଥାନାରେ ମାମଲା ରୁଜୁ କରାଯିବ ବୋଲି ସୂଚନା ଦେଇଛନ୍ତି ଚାଇଲ୍ଡଲାଇନ ସଦସ୍ୟ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
