ଭୁବନେଶ୍ବର: ପ୍ରଳୟଙ୍କାରୀ ବାତ୍ୟା ଫନି ସ୍ମାର୍ଟ ସିଟିକୁ ଛାରଖାର କରି ଦେଇଥିବାବେଳେ ସାଲିଆ ସାହି ବସ୍ତି ସମ୍ପୂର୍ଣ୍ଣ ଉଜୁଡି ଯାଇଛି ।
ଲୋକେ ଖାଇବା ତ ଦୂରର କଥା ପାଣି ବୁନ୍ଦାଏ ପାଇଁ ଗୋଟିଏ ନଳକୂପରେ ନିର୍ଭରଶୀଳ ହୋଇପଡ଼ିଛନ୍ତି ।
ବାତ୍ୟା ପରେ ବିଜୁଳି ବ୍ୟବସ୍ଥା ଏଯାଏଁ ସୁଧୁରିନଥିବାବେଳେ ଲୋକେ ପାଣି ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେବା ସହ ହନ୍ତସନ୍ତ ହେଉଛନ୍ତି । ଏଥି ସହିତ ବାହାରର ସବୁତକ ଅଳିଆ ଆସି ସାଲିଆ ସାହିର ବସ୍ତିରେ ଗଦା ହେଉଥିବାରୁ ବସ୍ତିରେ ଏକ ପ୍ରକାର ଅସ୍ବାସ୍ଥ୍ୟକର ପରିବେଶ ସୃଷ୍ଟି ହୋଇଛି ।
ବାତ୍ୟାର 4 ଦିନ ପରେ ବି କୌଣସି ପ୍ରଶାସନ ବସ୍ତିରେ ପହଞ୍ଚି ନ ଥିବା ବସ୍ତିବାସିନ୍ଦା ଅଭିଯୋଗ କରିଥିବାବେଳେ ଲାଇନ ଲଗାଇ ଚନ୍ଦ୍ରଶେଖରପୁର ପିଏଚଡି ଅଫିସରୁ ପାଣି ଆଣିବାକୁ ଯାଉଛନ୍ତି ବୋଲି କହିଛନ୍ତି । ଗୋଟିଏ ବାଲଟି ପିଛା 30 ଟଙ୍କା ଦେଇ ପାଣି କିଣିଥିବା ଲୋକେ କହିଛନ୍ତି ।
ଅନ୍ୟପକ୍ଷରେ ବାତ୍ୟା ସମୟରେ ବସ୍ତି ବାସିନ୍ଦାଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତରିତ କରା ନଯାଇଥିବାବେଳେ ବିସ୍କୁଟ ପ୍ୟାକେଟ ଖଣ୍ଡିଏ ବି ଦିଆଯାଇନଥିଲା ବୋଲି ବସ୍ତିବାସୀ ଅସନ୍ତୋଷ ପ୍ରକାଶ କରିଛନ୍ତି ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
