ବୌଦ୍ଧ: ବର୍ଷାରେ ବେହାଲ ହେଲାଣି ଜିଲ୍ଲାର ଅନେକ ସ୍ଥାନ । କେତେକ ସ୍ଥାନରେ ସଟ ସର୍କିଟ ହୋଇ କ୍ଷତି ହୋଇଥିବା ବେଳେ ବର୍ଷା ଯୋଗୁଁ ତଳିଆ ଅଞ୍ଚଳ ବର୍ଷା ପାଣିରେ ଉବୁଟୁବୁ । ସେପଟେ ବଘିଆପଡା ପଞ୍ଚାୟତର ପାଲଝାର କୃଷି ଫାର୍ମରେ ଉପୁଡି ଯାଇଥିବା ବିଦ୍ୟୁତ ଖମ୍ବର ତାର ସଂସ୍ପର୍ଶରେ ଆସି ୬ଟି ଗୋରୁ ମୃତ । ତେବେ ସେହି ଫାର୍ମର ଅନ୍ୟ ଦୁଇ କର୍ମଚାରୀ ଅଳ୍ପକେ ମୃତ୍ୟୁମୁଖରୁ ବର୍ତ୍ତି ଯାଇଥିବା ସୂଚନା ମିଳିଛି ।
ରବିବାର ଅପରାହ୍ନ ଭଳି ସୋମବାର ଅପରାହ୍ନରେ ମଧ୍ୟ ପ୍ରବଳ ଘୂର୍ଣ୍ଣିଝଡ ସହିତ ବଜ୍ରପାତ ଯୋଗୁଁ ବୌଦ୍ଧ ଜିଲ୍ଲାରେ ଜନ ଜୀବନ ଅସ୍ତବ୍ୟସ୍ତ । ଲଗାଣ ବର୍ଷା ଯୋଗୁଁ ତଳିଆ ଅଞ୍ଚଳ ବର୍ଷା ପାଣିରେ ବୁଡ଼ି ରହିଥିବା ଦେଖିବାକୁ ମିଳିଛି । ଜିଲ୍ଲା ସଦର ମହକୁମାର ବସଷ୍ଟାଣ୍ଡ, ରଘୁନାଥ ମନ୍ଦିର ଓ କେତେକ ବସ୍ତି ସହିତ ବିଭିନ୍ନ ସରକାରୀ କାର୍ଯ୍ୟାଳୟ ପରିସରରେ ବର୍ଷା ପାଣି ପଶିଯାଇଛି । ଏପରିକି ଜିଲ୍ଲାପାଳଙ୍କ କାର୍ଯ୍ୟାଳୟର ଅନେକ ବିଭାଗ ଭିତରେ ମଧ୍ୟ ବର୍ଷା ପାଣି ପଶି ଯିବାରୁ କର୍ମଚାରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ ।
ଇଟିଭି ଭାରତ, ବୌଦ୍ଧ
