ବୌଦ୍ଧ: ଜିଲ୍ଲା ପାଇଁ ଶୁକ୍ରବାର ପାଲଟିଥିଲା ଅଶୁଭ । 3ଟି ଅଘଟଣ ସମସ୍ତଙ୍କୁ ବିଚଳିତ କରିଥିଲା । ସମ୍ପୂର୍ଣ୍ଣ ଲକଡାଉନ ସମୟରେ 3ଟି ପୃଥକ ଘଟଣାରେ 3ଟି ମୃତ୍ୟୁ ସମସ୍ତଙ୍କୁ ବ୍ୟଥିତ କରିଛି ।
ପ୍ରଥମେ କୋରୋନା ସଂକ୍ରମଣ ଭୟରେ ବିଦ୍ୟାଳୟରୁ ଗତ ସପ୍ତାହରେ ଘରକୁ ଛୁଟିରେ ଆସିଥିବା ସପ୍ତମ ଶ୍ରେଣୀର ଛାତ୍ରୀଙ୍କ ସର୍ପାଘାତରେ ମୃତ୍ୟୁ ହୋଇଥିଲା । ସେହିପରି ଗାଈଙ୍କୁ ଗରମରୁ ରକ୍ଷା ପାଇଁ ନଦୀରେ ଗାଧୋଇବା ସମୟରେ ନିଜେ ବୁଡିଗଲେ ଯୁବକ । ଆଉ ଜଣେ ଢାବା କର୍ମଚାରୀଙ୍କ ମୃତଦେହକୁ ସନ୍ଦେହଜନକ ଭାବେ ଏକ ଗଛରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି ।
ହରଭଙ୍ଗା ଥାନା ଅନ୍ତର୍ଗତ ପଲସାକୁଟୁଣୀ ଗ୍ରାମର 13 ବର୍ଷୀୟା ପାୟଲ ବାରିକ ପୁରୁଣାକଟକ ସ୍ଥିତ କସ୍ତୁରବା ଗାନ୍ଧୀ ସରକାରୀ ଆବାସିକ ବିଦ୍ୟାଳୟରେ ସପ୍ତମ ଶ୍ରେଣୀର ଛାତ୍ରୀ । ଗତ ସପ୍ତାହରେ କୋରୋନାକୁ ନେଇ ବିଦ୍ୟାଳୟ ଛୁଟି ହେବାରୁ ନିଜ ଘରକୁ ଆସିଥିଲେ । ଗୁରୁବାର ଏକ ସର୍ପାଘାତରେ ତାଙ୍କ ମୃତ୍ୟୁ ହୋଇଯାଇଛି ।
ସେହିପରି ବୌଦ୍ଧ ଥାନା ଅନ୍ତର୍ଗତ ମୁର୍ଷୁଣ୍ଢି ଗାଁର 30 ବର୍ଷୀୟ ସୁଶୀଲ ବାଘ ମହାନଦୀରେ ଗାଈଙ୍କୁ ଗାଧୋଇବା ସମୟରେ ବାଲିଚର ଯୋଗୁଁ ନିଜେ ପାଣି ଭିତରକୁ ଟାଣି ହୋଇଯାଇଥିଲେ । ଫଳରେ ତାଙ୍କର ମୃତ୍ୟୁ ହୋଇଥିଲା ।
ଖୁଣ୍ଟବନ୍ଧ ଛକ ନିକଟରେ ଘଟିଛି ତୃତୀୟ ଘଟଣା । ଢାବାରେ କାମ କରୁଥିବା ଜଣେ ଯୁବକର ମୃତଦେହ ଝୁଲନ୍ତା ତଥା ସନ୍ଦେହଜନକ ଅବସ୍ଥାରେ ଉଦ୍ଧାର ହୋଇଛି । ପୋଲିସ ସମସ୍ତ ଅଘଟଣର ମୃତଦେହ ଜବତ କରି ତଦନ୍ତ ଆରମ୍ଭ କରିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
