ବୌଦ୍ଧ: ବେପରୁଆ ତଥା ଦ୍ରୁତ ଗତିରେ ଗାଡି ଚାଳନା ତଥା ରାସ୍ତା ଜବରଦଖଲ ଯୋଗୁଁ ସଡକ ଦୁର୍ଘଟଣା ବୃଦ୍ଧି ପାଇବାରେ ଲାଗିଛି । ଉଦବେଗଜନକ ସ୍ଥିତିରେ ସଡକ ଦୁର୍ଘଟଣା । ଦିନକୁ ଦିନ ଜିଲ୍ଲାରେ ସଡକ ଦୁର୍ଘଟଣାରେ ଧନଜୀବନ କ୍ଷୟକ୍ଷତି ହେବାରେ ଲାଗିଛି । ବିଶେଷ ଭାବରେ ବେପରୁଆ ତଥା ଦ୍ରୁତ ଗତିରେ ଗାଡିଚାଳନା ସାଙ୍ଗକୁ ରାସ୍ତା ଗୁଡିକ ଜବରଦଖଲ ଯୋଗୁଁ ଅଧିକାଂଶ ସମୟରେ ସଡକ ଦୁର୍ଘଟଣା ଘଟୁଛି ।
ସୋମବାର ରାତିରେ ଜହ୍ନାପଙ୍କ ଫାଣ୍ଡି ଅନ୍ତର୍ଗତ ମୁଣ୍ଡାପଡା ପଞ୍ଚାୟତ ଖମାରୀପଡା ଗ୍ରାମର ଜନୈକ ବ୍ୟକ୍ତିଙ୍କ ଘର ଭିତରେ ଏଟ ଟ୍ରକ ଭାରସାମ୍ୟ ହରାଇ ପଶି ଯିବାରୁ ପରିବାରଟି ଅଳ୍ପକେ ମୃତ୍ୟୁ ମୁଖରୁ ବର୍ତ୍ତିଯାଇଛନ୍ତି । ସେପଟେ ବୌଦ୍ଧ ପୌରପରିଷଦ ପକ୍ଷରୁ ସହରର ବିଭିନ୍ନ ରାସ୍ତା ଉପରେ ଦୀର୍ଘ ଦିନ ଧରି ଅବରୋଧ କରି ରଖିଥିବା ଇଟା, ବାଲି, ଗୋଡି ଆଦିକୁ ପୂର୍ବ ସୂଚନା ପ୍ରକାରେ ଉଠାଇ ନିଆଯାଇଛି ।
ସେହିପରି ମହାନଦୀ ସେତୁ ଛକ ନିକଟରୁ ଏନଏସି ଛକ ଦେଇ ଜାମୁଛକ ପର୍ଯ୍ୟନ୍ତ ରାସ୍ତା ସମ୍ପ୍ରସାରଣ କାର୍ଯ୍ୟ ଠିକରେ ହୋଇନଥିବା ସୂଚନା ମିଳିଛି । ରୋଡ ଡିଭାଇଡରକୁ ନେଇ ସମସ୍ୟା ଲାଗି ରହିଥିବା ବେଳେ ସୋମବାର ଜଙ୍ଗଲ ବିଭାଗର ପାଚେରୀ ଭାଙ୍ଗିବା ନିମନ୍ତେ ପୂର୍ତ୍ତ ବିଭାଗ ପହଞ୍ଚି ସ୍ଥିତି ଅନୁଧ୍ୟାନ କରିଥିଲା । ଉକ୍ତ ଅଞ୍ଚଳରେ ଜାତୀୟ ରାଜପଥ କଡରେ ଥିବା ସମସ୍ତ ସରକାରୀ ଜବରଦଖଲ ସ୍ଥାନକୁ ଉଚ୍ଛେଦ କରି ରାସ୍ତା ସମ୍ପ୍ରସାରଣ ପାଇଁ ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
