ବୌଦ୍ଧ: ଅଭାଗା ପରିବାର ପାଇଁ ଅଶୁଭ ପାଲଟିଛି ଶୁକ୍ରବାର । ଦୁଇ ବର୍ଷ ତଳେ ଏଭଳି ଶୁକ୍ରବାରରେ ପତ୍ନୀ ଆରପାରିକୁ ଯାଇଥିଲେ । ଏବେ ତାଙ୍କ ଅତୃପ୍ତ ଆତ୍ମା ସ୍ବାମୀଙ୍କୁ ସେହି ଶୁକ୍ରବାର ରେ ଆତ୍ମହତ୍ୟା କରିବାକୁ ପ୍ରବର୍ତ୍ତାଇ ଥିଲେ । ଏଭଳି କିଛି ଭୌତିକ କାଣ୍ଡ ସମ୍ପର୍କରେ ମୃତକଙ୍କ ଭାଇ ଇଟିଭି ଭାରତକୁ ସୂଚନା ଦେଇଛନ୍ତି ।
ସୂଚନା ଅନୁସାରେ, ଗତ ଶୁକ୍ରବାର ଦିନ ଅପରାହ୍ନରେ ବୌଦ୍ଧ ଜିଲ୍ଲା ମନମୁଣ୍ଡା ଥାନା ଠାରୁ କିଛି ମିଟର ଦୂରରେ ଜଣେ ଯୁବକ ହଠାତ ଆତ୍ମହତ୍ୟା କରିଛନ୍ତି । ମୃତକ ଯୁବକ ଅଲେଖ ମେହେରଙ୍କ ସେଭଳି କୌଣସି ଅସୁବିଧା ନଥିଲା । କିନ୍ତୁ ଯୁବକ ଜଣଙ୍କ ଏଭଳି ପଦକ୍ଷେପ ନେବା ପଛରେ ଏକ ଭୌତିକ କାଣ୍ଡ ରହିବା ସମ୍ପର୍କରେ ମୃତକଙ୍କ ଭାଇ ସୂଚନା ଦେଇଛନ୍ତି ।
ତେବେ ମୃତକ ଅଲେଖଙ୍କ ପତ୍ନୀ ଗତ ଦୁଇ ବର୍ଷ ତଳେ ଏଭଳି ଏକ ଶୁକ୍ରବାର ଦିନ ଦୁର୍ଘଟଣାର ଶିକାର ହୋଇ ମୃତ୍ୟୁବରଣ କରିଥିଲେ । ସେବେଠାରୁ ଉକ୍ତ ମହିଳାଙ୍କ ପ୍ରେତାତ୍ମା ନିଜ ପରିବାରର ବିଭିନ୍ନ ଲୋକଙ୍କ ଉପରେ ସବାର ହେବାରୁ ଅନେକ ଥର ଗୁଣିଆ ଡକାଯାଇ ଏହାର ପ୍ରତିକାର କରାଯାଇଥିଲା ।
କିନ୍ତୁ ଶେଷରେ ଏଭଳି ନିଷ୍ପତ୍ତି ଗ୍ରହଣ କରିବାକୁ କୁଆଡେ ପ୍ରେତାତ୍ମା ଅଲେଖଙ୍କୁ ବାଧ୍ୟ କରିଥିଲା । ବିଶ୍ୱାସ, ଅବିଶ୍ୱାସ ତଥା ଅନ୍ଧବିଶ୍ୱାସର ଅନ୍ଧ ଗଳିରେ ମଣିଷ ଆଜି ମଧ୍ୟ ଏହି ଭୌତିକ କାଣ୍ଡର ସତ୍ୟତାକୁ ଅନୁଭବ କରୁଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
