ବୌଦ୍ଧ: ଅବହେଳିତ ଅବସ୍ଥାରେ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି । ପରିସର ଅଣଦେଖା ହେତୁ ଅତ୍ୟନ୍ତ ପୂତ୍ତ ଗନ୍ଧମୟ ପରିବେଶରେ ପରିଣତ ହୋଇଛି । ଏହାକୁ ନେଇ ବିଜୁପ୍ରେମୀ ବେଶ ମର୍ମାହତ ।
ପୂତ୍ତ ଗନ୍ଧମୟ ପରିବେଶ ମଧ୍ୟରେ ପ୍ରବାଦ ପୁରୁଷ ବିଜୁବାବୁଙ୍କ ପ୍ରତିମୂର୍ତ୍ତି । ଅତ୍ୟନ୍ତ ଅବହେଳିତ ହୋଇ ପଡିଥିବା ଏହି ସ୍ଥାନ କୌଣସି ଉପାନ୍ତ ଅଞ୍ଚଳ ନୁହେଁ, ଏହା ହେଉଛି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ କାର୍ଯ୍ୟାଳୟ ତଥା ୫୭ ନମ୍ବର ଜାତୀୟ ରାଜପଥ କଡରେ । ହରଭଙ୍ଗା ବ୍ଲକର ପ୍ରମୁଖ ସ୍ଥାନ ଚାରିଛକର ଏକ ମୁଖ୍ୟ ରାସ୍ତା କଡରେ ବିଜୁବାବୁଙ୍କ ପ୍ରତିମୂର୍ତ୍ତିର ଏଭଳି ସ୍ଥିତି ଏବେ ସମସ୍ତଙ୍କୁ ବ୍ୟଥିତ କରିଛି । ମୂର୍ତ୍ତିର ପରିସରରେ ନର୍ଦ୍ଦମା ପାଣି ସହିତ ଘଞ୍ଚ ଲଟାବୁଦାରେ ପୁରିଗଲାଣି । ବ୍ଲକ ପ୍ରଶାସନ କିମ୍ବା ପଞ୍ଚାୟତ ପ୍ରଶାସନ ସବୁ ଦେଖି ମଧ୍ୟ ଅଜଣା ଭଳି ରହୁଥିବା ଚର୍ଚ୍ଚା ହେଉଛି । ବିଜୁବାବୁଙ୍କ ପ୍ରତିମୂର୍ତ୍ତିର ଏଭଳି ଅବସ୍ଥା ଦେଖି ବିଜୁପ୍ରେମୀ ଗଭୀର ମର୍ମାହତ ହୋଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
