ବୌଦ୍ଧ: ଚୋରା ରନ୍ଧା ମଦ ଓ କୁଚିଆ ମଦ ବେପାର ଯୋଗୁଁ ବର୍ତ୍ତମାନ ଚିନ୍ତାରେ ହଜାର ହଜାର ପରିବାର। ବୌଦ୍ଧ ଜିଲ୍ଲାର ବିଭିନ୍ନ ପଞ୍ଚାୟତର ଅନେକ ଗାଁରେ ଛୋଟ ପାନ ଦୋକାନ ଠାରୁ ଆରମ୍ଭ କରି ବିଭିନ୍ନ ହୋଟେଲ ଓ ଦୋକାନରେ ଦେଶୀ ଓ ବିଦେଶୀ ମଦର ଖୋଲାଖୋଲି ବେପାର ହେଉଛି।
ଜିଲ୍ଲାର ଆଢେଣୀଗଡ ପଞ୍ଚାୟତ ଅନ୍ତର୍ଗତ ମାଧପୁର ଗାଁରେ ମଦକୁ ନେଇ ଏଭଳି ପରିସ୍ଥିତି ହୋଇଛି ଯେ, ଏହାକୁ ପାନ କରି ଅନେକ ପରିବାରର ପୁରୁଷ ମୃତ୍ୟୁ ବରଣ କରିଛନ୍ତି । ଯେଉଁଥିପାଇଁ ଏଠାରେ ମହିଳା ମାନେ ପରିବାରର ମୁଖ୍ୟ ହୋଇ ବିଭିନ୍ନ ପେଷାକୁ ଆପଣେଇଛନ୍ତି । ସେପଟେ ଜିଲ୍ଲାର ମୁଣ୍ଡିପଦର ପଞ୍ଚାୟତ ପଲସପାଟ ଗାଁରେ ଆଜି ସ୍ବୟଂ ସହାୟକ ଗୋଷ୍ଠୀର ମହିଳା ମାନେ ଏକତ୍ରିତ ହୋଇ ଗାଁରେ କୁଚିଆ ମଦ ବିକ୍ରିକୁ ସମ୍ପୂର୍ଣ୍ଣ ନିଷେଧ କରିବାକୁ ଅଣ୍ଟା ଭିଡିଛନ୍ତି ।
ହରିପୁର ଗାଁ ନିକଟସ୍ଥ ମଦଭାଟିରୁ ବ୍ୟାପକ ମାତ୍ରାରେ ମଦ କୁଚିଆ ସହାୟତାରେ ବିକ୍ରିକୁ ମହିଳା ମାନେ ତୀବ୍ର ବିରୋଧ କରିଛନ୍ତି । ଏନେଇ ଆଗାମୀ ଦିନରେ ଜନ ଆନ୍ଦୋଳନ ହେବା ନେଇ ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
