ବୌଦ୍ଧ: ପୋଲିସ ଆଖିରେ ଧୂଳି ଦେଇ ଗୋଟିଏ ପରେ ଗୋଟିଏ ଅପରାଧ କରିଚାଲିଛି ଅପରାଧି । ଆଉ ଏମାନଙ୍କ ଟେର ପାଉନି ପୋଲିସ। ଗତ 10 ଦିନ ମଧ୍ୟରେ ବୌଦ୍ଧ ଜିଲ୍ଲା ପୁରୁଣାକଟକ ଥାନା ଅନ୍ତର୍ଗତ ବିଭିନ୍ନ ସ୍ଥାନରେ ଲଗାତାର ତିନି ତିନିଟି ଚୋରି ଡକାୟତି ଯୋଗୁଁ ସମସ୍ତେ ଆତଙ୍କିତ ହୋଇପଡିଛନ୍ତି । ପୋଲିସ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉନଥିବା ଅଭିଯୋଗ ହୋଇଛି ।
ପୁରୁଣାକଟକ ଥାନା ଅନ୍ତର୍ଗତ ମାଧପୁର ସ୍ଥିତ ଉତ୍କଳ ଗ୍ରାମ୍ୟ ବ୍ୟାଙ୍କରୁ 10 ଦିନ ତଳେ ତାଲା ଭାଙ୍ଗି ଟଙ୍କା ଲୁଟି ନେଇଥିବା ବେଳେ ପୁରୁଣାକଟକ ଥାନା ନିକଟରେ ଥିବା ଏକ ବିଦେଶୀ ମଦ ଦୋକାନରେ ଦୁର୍ବୃତ୍ତ ମାନେ କଳାକନା ବୁଲାଇ ଦେଇଥିଲେ । ସେପଟେ ଗତ ଶନିବାର ରାତିରେ ପୁରୁଣାକଟକ ନିକଟସ୍ଥ ଜିଆଁକଟା ଗ୍ରାମର ଜଣେ ବ୍ୟବସାୟୀଙ୍କ ଘରେ ରାତି ଅଧରେ ଡକାୟତଙ୍କ ଏକ ଦଳ ମାରଣାସ୍ତ୍ର ଦେଖାଇ କୋଡିଏ ଲକ୍ଷରୁ ଉର୍ଦ୍ଧ୍ବ ଟଙ୍କା ଓ ଅଳଙ୍କାର ଲୁଟି ନେଇଥିବା ଅଭିଯୋଗ ହୋଇଥିଲା । ତେବେ ପୁରୁଣାକଟକ ଥାନା ଅଞ୍ଚଳରେ ବାରମ୍ବାର ଏଭଳି ଅପରାଧିକ ଘଟଣା ଘଟୁଥିବାରୁ ଏନେଇ ଅଞ୍ଚଳରେ ଆତଙ୍କ ଖେଳିଯାଇଛି । ବାରମ୍ବାର ଏଭଳି ଘଟଣା ଘଟୁଥିଲେ ମଧ୍ୟ ପୋଲିସର କାର୍ଯ୍ୟାନୁଷ୍ଠାନୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଇଟିଭି ଭାରତ, ବୌଦ୍ଧ
