ବୌଦ୍ଧ: ଜିଲ୍ଲାର ବିଭିନ୍ନ ମଣ୍ଡିରେ ଚାଲିଛି ଧାନକ୍ରୟ । ବୌଦ୍ଧର ସମୁଦାୟ 42ଟି ସମବାୟ ସମିତି ସମେତ ଅନ୍ୟ ଧାନକ୍ରୟ କେନ୍ଦ୍ରରୁ ଧାନ ସଂଗ୍ରହ ହେଉଛି । ତେବେ କିଛି ନିର୍ଦ୍ଧିଷ୍ଟ ମଣ୍ଡିରେ ଚାଷୀଙ୍କ ଧାନକ୍ରୟ କରାନଯାଇ ବେପାରୀଙ୍କ ଠାରୁ ଧାନ କିଣାଯାଉଛି । ମଣ୍ଡି କର୍ମଚାରୀମାନେ ଜାଣିଶୁଣି ଚାଷୀଙ୍କୁ ହଇରାଣ ହରକତ କରୁଛନ୍ତି । ଏହାସହ ଏଫଏକ୍ୟୁ ନାଁରେ ଚାଷୀଙ୍କୁ ନିରାଶ ହେବାକୁ ପଡୁଥିବାରୁ ସେମାନେ ବାଧ୍ୟ ହୋଇ ବେପାରୀକୁ ଧାନ ଦେଇ ଅଭାବୀ ବିକ୍ରିର ସମ୍ମୁଖୀନ ହେଉଥିବା ଅଭିଯୋଗ ହୋଇଛି ।
ସେପଟେ ସଙ୍କୁଳେଇ ମଣ୍ଡିର ଉପକେନ୍ଦ୍ର ଛତ୍ରଙ୍ଗ ଧାନକ୍ରୟ କେନ୍ଦ୍ରରେ ପଡୋଶୀ ଫୁଲବାଣୀ ଓ ଦଶପଲ୍ଲା ଅଞ୍ଚଳର ବେପାରୀଙ୍କ ଧାନକ୍ରୟ କରାଯାଉଥିବା ଅଭିଯୋଗ କରିଛନ୍ତି ଚାଷୀ । ଏ ସମ୍ପର୍କରେ ସୋମବାର ଜିଲ୍ଲା କିଷାନ ସଂଘ ପକ୍ଷରୁ ବୌଦ୍ଧ ଯୋଗାଣ ଅଧିକାରୀଙ୍କୁ ଅବଗତ କରାଯିବା ସହ ଏହାର ପ୍ରତିକାର ପାଇଁ ଦାବି କରାଯାଇଥିଲା । ତେବେ ଏନେଇ ଉପଯୁକ୍ତ ତଦନ୍ତ କରାଯାଇ ପଦକ୍ଷେପ ଗ୍ରହଣ କରାଯିବ ବୋଲି ସୂଚନା ଦେଇଛି ଯୋଗାଣ ବିଭାଗ ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
