ବୌଦ୍ଧ: ପଞ୍ଚାୟତ ରାସ୍ତା ନିର୍ମାଣରେ ଆର୍ଥିକ ଅନିୟମିତତା ହୋଇଥିବା ଅଭିଯୋଗ । ରାସ୍ତାରେ ମେଟାଲ ମୋରମ ନପଡି କେବଳ କାଗଜ କଲମରେ କାମ ଦର୍ଶାଇ ଲକ୍ଷ ଲକ୍ଷ ଟଙ୍କା ହଡପ ହୋଇଥିବା ଗ୍ରାମବାସୀ କହିଛନ୍ତି । ଏହି ଘଟଣା ଘଟିଛି ବୌଦ୍ଧ ଜିଲ୍ଲା ବଘିଆପଡା ପଞ୍ଚାୟତ ଅଞ୍ଚଳରେ ।
ଭିଡିଓ ସୌଜନ୍ୟ: ପ୍ରତିନିଧି, ବୌଦ୍ଧ
ଆରଡି ରାସ୍ତା ସାନ ଗୋଛାପଡା ଠାରୁ ଝାଙ୍କରପଡା ପର୍ଯ୍ୟନ୍ତ ଏନ ଆର ଇଜିଏସ ରାସ୍ତାରେ ହୋଇଛି ଆର୍ଥିକ ଅନିୟମିତତା । ଗ୍ରାମବାସୀ ଏ ସମ୍ପର୍କରେ ସିଧାସଳଖ ପଞ୍ଚାୟତ ପ୍ରଶାସନ ଓ ଯନ୍ତ୍ରୀଙ୍କ ଆଡକୁ ଆଙ୍ଗୁଳି ନିର୍ଦ୍ଦେଶ କରିଛନ୍ତି । 4 ଲକ୍ଷ 60 ହଜାର ଟଙ୍କା ବ୍ୟୟ ଅଟକଳରେ ନିର୍ମିତ ଏହି ରାସ୍ତାରେ ମାଟି ମୋରମ କାର୍ଯ୍ୟ ଆଦୌ କରାଯାଇ ନଥିବା ରୋକଠୋକ ଅଭିଯୋଗ କରିଛନ୍ତି ଅଞ୍ଚଳବାସୀ ।
ଏ ସମ୍ପର୍କରେ ପଞ୍ଚାୟତ ପ୍ରଶାସନ କିମ୍ବା ବିଡ଼ିଓ ଙ୍କ ପ୍ରତିକ୍ରିୟା ମିଳିପାରିନାହିଁ । ସେପଟେ ତୁରନ୍ତ ଏଦିଗ ପ୍ରତି ପ୍ରଶାସନ ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
