ବୌଦ୍ଧ: ଆଖି ପିଛୁଳାକେ ଟଙ୍କା ଭର୍ତ୍ତି ବ୍ୟାଗ ଲୁଟ କରିନେଲେ ଲୁଟେରା । ଅଭିଯୋଗ ଆସିଛି ବୌଦ୍ଧ ଜିଲ୍ଲାର ବାଉଁଶୁଣୀ ଥାନା ଅଞ୍ଚଳରୁ । ବାଉଁଶୁଣୀ ଥାନା ଅନ୍ତର୍ଗତ ବାଉଁଶୁଣୀ ଗାଁର ଜନୈକ ବ୍ୟକ୍ତିଙ୍କ ପାଖରୁ ଟଙ୍କା ଭର୍ତ୍ତି ବ୍ୟାଗ ଲୁଟ ହୋଇଥିବା ଅଭିଯୋଗ ହୋଇଛି । ଏନେଇ ବାଉଁଶୁଣୀ ଥାନାରେ ଏକ ଲିଖିତ ଅଭିଯୋଗ ହୋଇ କେସ ନଂ 131/19ରେ ତଦନ୍ତ ଆରମ୍ଭ କରିଛି ପୋଲିସ ।
ସୂଚନା ମୁତାବକ ବାଉଁଶୁଣୀ ସୋନପୁରୀଆ ପଡାର ଚିତ୍ତ ରଞ୍ଜନ ମେହେର ନିଜ ଝିଅର ବାହାଘର ପାଇଁ ବୌଦ୍ଧ ଷ୍ଟେଟ ବ୍ୟାଙ୍କରୁ 2 ଲକ୍ଷ 80 ହଜାର ଟଙ୍କା ଉଠାଇଥିଲେ । ବାଇକର ଡିକିରେ ଏକ ବ୍ୟାଗରେ ସମୁଦାୟ ଟଙ୍କା ନ ରହିବାରୁ ସେ 2 ଲକ୍ଷ 40 ହଜାର ଟଙ୍କା ରଖି ବଳକା 40 ହଜାର ଟଙ୍କା ଅଲଗା ରଖିଥିଲେ । ଏହି ଟଙ୍କା ନେଇ ଚିତ୍ତ ରଞ୍ଜନ ବାଉଁଶୁଣୀସ୍ଥିତ ନିଜ ଘର ସମ୍ମୁଖରେ ଗାଡି ରଖି ଘର କବାଟ ଖୋଲିବାକୁ ଯାଇଥିଲେ । ହେଲେ କବାଟ ଖୋଲି ରାସ୍ତାକୁ ଫେରିବା ବେଳକୁ ବାଇକ ଡିକିରେ ଥିବା ଟଙ୍କା ବ୍ୟାଗକୁ ଲୁଟି ନେଇଥିଲେ ଦୁର୍ବୃତ୍ତ ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ଦୁର୍ବୃତ୍ତ ଦୁହେଁ ଏକ ଆପାଚି ବାଇକରେ ଆସି ଲୁଟ କରି ସୋନପୁର ରାସ୍ତାରେ ଫେରାର ହୋଇଥିଲେ । ଏସମ୍ପର୍କରେ ବାଉଁଶୁଣୀ ଥାନାରେ ଲିଖିତ ଅଭିଯୋଗ ହୋଇ କେସ ନଂ 131/19ରେ ତଦନ୍ତ ଆରମ୍ଭ ହୋଇଛି । ପ୍ରକାଶ ଥାଉ କି ବାଉଁଶୁଣୀ ଥାନା ଅଧିନରେ ଗତ ବର୍ଷେ ମଧ୍ୟରେ ସମୁଦାୟ 6ଟି ଲୁଟତରାଜ ଓ ରାହାଜାନୀ ଘଟଣା ଘଟିଥିଲେ ମଧ୍ୟ ଗୋଟିଏ ବି ସଫଳତା ପୋଲିସକୁ ଆଜି ଯାଏଁ ମିଳିପାରି ନାହିଁ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
