ବୌଦ୍ଧ: କଣ୍ଟାମାଳ ବ୍ଲକର ବିଭିନ୍ନ ପଞ୍ଚାୟତରେ ରାସ୍ତା ନିର୍ମାଣ କାର୍ଯ୍ୟରେ ଅନିୟମିତତା ଅଭିଯୋଗ। ଯାହାକୁ ନେଇ ତାତିଲେ ଅଞ୍ଚଳବାସୀ । ଶେଷରେ ବନ୍ଦ କଲେ ରାସ୍ତା କାମ । କଣ୍ଟାମାଳ ବ୍ଲକର ବରଗାଁ, ନାରାୟଣପ୍ରସାଦ, ଉମା, ଲମ୍ବସରୀ, ବରଗୋଛା, ଶଗଡା ଭଳି ବିଭିନ୍ନ ଉପାନ୍ତ ପଞ୍ଚାୟତରେ ରାସ୍ତା ନିର୍ମାଣ ନାଁରେ ଅତି ନିମ୍ନ ମାନର କାର୍ଯ୍ୟ ହେଉଥିବା ବାରମ୍ବାର ଅଭିଯୋଗ ହୋଇଆସୁଛି ।
ଗତ ଚାରି ଦିନ ପୂର୍ବରୁ ଏଭଳି ଏକ ଅଭିଯୋଗ ବରଗୋଛା ପଞ୍ଚାୟତରୁ ଆସିଥିଲା । ସୂଚନା ମୁତାବକ ବରଗୋଛା ପଞ୍ଚାୟତ ସାନଝାଙ୍କରପାଲି ଗ୍ରାମରେ 85 ଫୁଟ ରାସ୍ତା କଙ୍କ୍ରିଟ କାର୍ଯ୍ୟ ଅତି ନିମ୍ନ ମାନର କରି 45 ଫୁଟ ରାସ୍ତା ଯନ୍ତ୍ରୀଙ୍କ ବିନା ଉପସ୍ଥିତିରେ ସରପଞ୍ଚ କରିଥିବା ଅଭିଯୋଗ କରି ଅଞ୍ଚଳବାସୀ କାମକୁ ବନ୍ଦ କରିଦେଇଥିଲେ । ତେବେ ଏହି କାର୍ଯ୍ୟରେ ବ୍ୟାପକ ଅନିୟମିତତା ହୋଇଥିବା ସମ୍ପର୍କରେ ବ୍ଲକ ପ୍ରଶାସନ ପକ୍ଷରୁ ଜଣାପଡିଛି । ଏଭଳି ଦୁର୍ନୀତି କଣ୍ଟାମାଳ ବ୍ଲକର ବିଭିନ୍ନ ପଞ୍ଚାୟତରେ ରିତିମତ ଚାଲିଥିଲେ ମଧ୍ୟ ବ୍ଲକ ପ୍ରଶାସନ କାହିଁକି ଚୁପ ବସିଛି ସେନେଇ ଉଠିଛି ପ୍ରଶ୍ନ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
