ବୌଦ୍ଧ: ଦ୍ରୁତ ଗତିରେ କୋରୋନା ସଂକ୍ରମଣ ବୃଦ୍ଧି ପାଉଥିବାରୁ ସାରା ରାଜ୍ୟରେ ସପ୍ତାହାନ୍ତ ସଟଡାଉନ ଆରମ୍ଭ ହୋଇଛି । ବୌଦ୍ଧ ସହରରେ ଶନିବାର ଓ ରବିବାର ସଟଡାଉନ ଯୋଗୁଁ ବଜାରରେ ଅସମ୍ଭବ ଭିଡ଼ ପରିଲକ୍ଷିତ ହୋଇଥିବା ବେଳେ ପ୍ରଶାସନ ପକ୍ଷରୁ ବିଭିନ୍ନ ଦୋକାନରେ ଚଢ଼ାଉ କରାଯାଇଥିବା ସୂଚନା ମିଳିଛି ।
ଜିଲ୍ଲାର ବିଭିନ୍ନ ସ୍ଥାନରୁ 20 ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ବୌଦ୍ଧ ସହରର ବିଭିନ୍ନ ସ୍ଥାନରୁ 11 ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ଲଗାତାର ବୌଦ୍ଧ ପୌରାଞ୍ଚଳରୁ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାରୁ ସାଧାରଣ ଲୋକ ଆତଙ୍କିତ ହୋଇପଡିଛନ୍ତି । ସେପଟେ ଅମାନିଆ ଲୋକଙ୍କ ଯୋଗୁଁ ଏହି ସଂକ୍ରମଣ ଆହୁରି ବୃଦ୍ଧି ପାଇବାର ଆଶଙ୍କା ସୃଷ୍ଟି ହୋଇଛି ।
ଶୁକ୍ରବାର ବୌଦ୍ଧ ସହରରୁ ଆଉ 11 ଜଣ ଆକ୍ରାନ୍ତ ଚିହ୍ନଟ ପରେ ସହରର ବିଭିନ୍ନ ସ୍ଥାନକୁ ମାଇକ୍ରୋ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି । ଶନିବାର ଓ ରବିବାର ସଟଡାଉନ ଯୋଗୁଁ ଶୁକ୍ରବାର ବୌଦ୍ଧର ବଜାରରେ ରାତି 9ଟା ପର୍ଯ୍ୟନ୍ତ ଏଭଳି ଅସମ୍ଭବ ଭିଡ଼ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ଲୋକେ ସମସ୍ତ କୋଭିଡ କଟକଣାକୁ ଭୁଲିଗଲା ଭଳି ମନେହେଉଥିଲା । ପ୍ରଶାସନ ପକ୍ଷରୁ କେତେକ ସ୍ଥାନରେ ଚଢ଼ାଉ କରାଯାଇ କେତେକ ଅମାନିଆ ଦୋକାନୀଙ୍କ ଠାରୁ ମୋଟା ଅଙ୍କର ଫାଇନ କାଟି ସତର୍କତା ମୂଳକ ଚେତାବନୀ ଦିଆଯାଇଥିବା ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
