ବୌଦ୍ଧ: ଦେଶରେ କି ରାଜ୍ୟରେ କେହି ବାସହୀନ ରହିବେ ନାହିଁ । ଖାଲି ଏତିକି ନୁହେଁ ଅଗ୍ରାଧିକାର ଭିତ୍ତିରେ ଅତ୍ୟନ୍ତ ଗରିବ ଓ ବାସହୀନ ଲୋକଙ୍କୁ ଚିହ୍ନଟ କରାଯାଇ ଘର ଯୋଗାଇ ଦିଆଯିବ । ଏହାସହ ମାନସିକ ଅଗ୍ରସର ଭିନ୍ନକ୍ଷମଙ୍କୁ ମଧ୍ୟ ତତ୍କାଳ ଘର ଯୋଗାଇବାକୁ ସମସ୍ତ ଜିଲ୍ଲାପାଳ ମାନଙ୍କୁ ରାଜ୍ୟ ସରକାର କଡା ନିର୍ଦେଶ ଜାରି କରିଛନ୍ତି । ରାଜ୍ୟରେ ବିଜୁ ପକ୍କା ଘର ଯୋଜନା କାର୍ଯ୍ୟକାରୀ ହେଉଥିବା ବେଳେ କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ ଆବାସ ଯୋଜନା କାର୍ଯ୍ୟକାରୀ ହେଉଛି ।
ଏହା ସତ୍ବେ ଅସୁବିଧା କେଉଁଠି ରହୁଛି ? ସରକାରଙ୍କ ନିର୍ଦେଶ ସତ୍ବେ ଅଗ୍ରାଧିକାର ଭିତ୍ତିରେ ଅତ୍ୟନ୍ତ ଗରିବ ଓ ନିରାଶ୍ରୟ ଲୋକଙ୍କୁ କାହିଁକି ଯୋଗାଇ ଦିଆଯାଉନି ସରକାରୀ ଆବାସ । ସରକାର ଯେତେ ଡିଣ୍ଡିମ ପିଟିଲେ ମଧ୍ୟ ସବୁ ଯୋଜନା ବାଟବଣା ହେଉଛି ।
ଏମିତି ଏକ ଅତ୍ୟନ୍ତ ସମ୍ବେଦନଶୀଳ ଘଟଣା ସାମ୍ନାକୁ ଆସିଛି । ଘଟଣା ହେଉଛି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଅନ୍ତର୍ଗତ ରାମଗଡ ପଞ୍ଚାୟତ କାର୍ଯ୍ୟାଳୟ ଠାରୁ ମାତ୍ର ଶହେ ମିଟର ଦୂରର । ପଞ୍ଚାୟତ କାର୍ଯ୍ୟାଳୟ ଠାରୁ ମାତ୍ର ଶହେ ମିଟର ଦୂରରେ ଏକ ଛୋଟିଆ ବାରଣ୍ଡାରେ ଖଜୁରୀ ପତ୍ରରେ ନିର୍ମିତ ଝୁମ୍ପୁଡି କୁଡିଆ କରି ଦୀର୍ଘବର୍ଷ ହେଲା ରହୁଛନ୍ତି ଜଣେ ବୃଦ୍ଧା ଓ ତାଙ୍କର ମାନସିକ ଅଗ୍ରସର ଝିଅ । ଯାହା ନଦେଖିଲେ କେହି ବିଶ୍ବାସ କରିବେ ନାହିଁ । ଆଜକୁ ପ୍ରାୟ 20 ବର୍ଷ ତଳେ ବୃ୍ଦ୍ଧାଙ୍କ ସ୍ବାମୀ ଆରପାରିକୁ ଚାଲି ଯାଇଥିଲେ । ସେବେଠାରୁ ବୃଦ୍ଧା ଜଣଙ୍କ ଅତି ଦୁର୍ଦ୍ଦଶାରେ ଜୀବନ ବିତାଉଛନ୍ତି ।
ପଞ୍ଚାୟତ କାର୍ଯ୍ୟାଳୟ ଠାରୁ ମାତ୍ର ଶହେ ମିଟର ଦୂରରେ ବୃଦ୍ଧା ଜଣଙ୍କ ବସବାସ କରୁଥିଲେ ମଧ୍ୟ କାହିଁକି କୌଣସି ସରକାରୀ ବାବୁଙ୍କ ନଜର ପଡୁନାହିଁ । ଅନ୍ୟପଟେ ଆମ ପ୍ରତିନିଧି ବୃଦ୍ଧାଙ୍କ ସମସ୍ୟା ନେଇ ରାମଗଡ ପଞ୍ଚାୟତ ସରପଞ୍ଚଙ୍କୁ ପଚାରିବାରୁ ସେ କହିଛନ୍ତି ସମ୍ପୃକ୍ତ ବୃ୍ଦ୍ଧାଙ୍କ ଇସିସି ତାଲିକାରେ ନା ନଥିବାରୁ ତାଙ୍କୁ ଘର ମିଳିପାରି ନାହିଁ । ଆଗାମୀ ଦିନରେ ଯୋଗାଇ ଦିଆଯିବ । ତେବେ ଏଠି ପ୍ରଶ୍ନ ଉଠୁଛି ଆଉ କେବେ ମିଳିବ ଘର ? ବୃଦ୍ଧା ଆଉ କେଉଁସ୍ତରକୁ ଗଲେ ଘର ଖଣ୍ଡେ ଯୋଗାଇ ଦେବେ ସ୍ପଷ୍ଟ କରିବେ କି ସରପଞ୍ଚ ବାବୁ ।
ବୌଦ୍ଧରୁ ସତ୍ୟ ନରାୟଣ ପାଣି, ଇଟିଭି ଭାରତ
