ବୌଦ୍ଧ: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ନେଇ ଗାଁ ଗାଁରେ ଜୋରସୋର ଚାଲିଛି ନିର୍ବାଚନ ପ୍ରଚାର। ପଞ୍ଚାୟତ ନିର୍ବାଚନକୁ ନେଇ ବୌଦ୍ଧରେ ନିର୍ବାଚନୀ ଉଷ୍ଣତା ବଢିବା ସହ ବୃଦ୍ଧି ପାଉଛି ହିଂସାକାଣ୍ଡ । ଜିଲ୍ଲାର ସମସ୍ତ ୯ ଗୋଟି ଜିଲ୍ଲା ପରିଷଦ ଜୋନ ସହିତ ୬୯ ଗୋଟି ପଞ୍ଚାୟତରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ସରଗରମ ରହିଛି ରାଜନୀତି । ଗାଁ ଗାଁରେ ଭୋଜିଭାତ ଓ ମଦ ମାଂସର ଆସର ଜମୁଛି । ଯାହା ଉଭୟ ଜିଲ୍ଲା ଓ ପୋଲିସ ପ୍ରଶାସନର ମୁଣ୍ଡବିନ୍ଧା ସାଜିଛି ।
ଏପଟେ ଶଗଡା ଫାଣ୍ଡି ଅନ୍ତର୍ଗତ ଚାଞ୍ଚେର ଗ୍ରାମର ଜନୈକ ଆଦିବାସୀ ନେତାଙ୍କ ଘରୁ ୯୪ ଟି ପ୍ରତିବନ୍ଧିତ ଜିଲେଟିନକୁ ଏସଓଜି ପକ୍ଷରୁ ଜବତ କରାଯିବା ସହ ସମ୍ପୃକ୍ତ ନେତାଙ୍କୁ ଗିରଫ ଘଟଣା ସାରା ଜିଲ୍ଲାରେ ଏବେ ଚର୍ଚ୍ଚାର ବିଷୟ ହୋଇଛି । ତେବେ ଏହି ବେଆଇନ କାରବାର ପଛରେ ମାଓବାଦୀଙ୍କ ସମ୍ପୃକ୍ତି ନା ଅନ୍ୟ କେଉଁ ଗୋଷ୍ଠୀର ସମ୍ପୃକ୍ତି ରହିଛି ସେନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ ।
ପୋଲିସ ପକ୍ଷରୁ ଜିଲ୍ଲାର କେତେକ ସ୍ଥାନରେ ନିର୍ବାଚନ ପୂର୍ବରୁ ଫ୍ଲାଗ ମାର୍ଚ୍ଚ କରାଯାଇ ଥିବା ବେଳେ ଶୁଣ୍ଢିପଦର ଭଳି କେତେକ ପଞ୍ଚାୟତରେ ନିର୍ବାଚନ ପୂର୍ବରୁ ହିଂସାକାଣ୍ଡ ପ୍ରଶାସନ ପାଇଁ ଚ୍ୟାଲେଞ୍ଜ ହୋଇଛି । ତୁରନ୍ତ ସମ୍ବେଦନଶୀଳ ବୁଥ ଓ ସ୍ଥାନକୁ ଚିହ୍ନଟ କରାଯାଇ ଅଧିକ ପୋଲିସ ମୃତୟନ ସହିତ ସିସିଟିଭି ଲଗାଇବାକୁ ବୁଦ୍ଧିଜୀବୀ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
