ବୌଦ୍ଧ: ଦୀର୍ଘ ଦିନର ଦାବି ପରେ କୋଟି କୋଟି ଟଙ୍କାର ମେଗା ଲିପ୍ଟ ପଏଣ୍ଟ ସ୍ଥାପନ ହେଲା । କିନ୍ତୁ ପୂର୍ବ ପରି ଜଳକଷ୍ଟରେ ହନ୍ତସନ୍ତ ହେଉଛନ୍ତି ଅଞ୍ଚଳବାସୀ । ଆଉ ଅଭିଯୋଗ କଲେ ଦେଖିବାକୁ ପଡୁଛି ପୋଲିସର ନାଲି ଆଖି ।
ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକରେ ଜଳସେଚନର ସୁବ୍ୟବସ୍ଥା ନିମନ୍ତେ ଦୀର୍ଘ ଦିନର ଦାବିକୁ ସରକାର ମାନି ତେଲନଦୀ ନିକଟରେ ଚାରୋଟି ମେଗା ଲିପ୍ଟ ପଏଣ୍ଟ ସ୍ଥାପନ କଲେ । କିନ୍ତୁ ଉପଯୁକ୍ତ ଭାବରେ ପାଇପ ବିଛା କାର୍ଯ୍ୟ ହୋଇ ନ ଥିବାରୁ ଏବେବି ଜଳସେଚନରୁ ବଞ୍ଚିତ ହେଉଛନ୍ତି ଚାଷୀ । ଏଭଳି ଏକ ସ୍ଥାନରେ ଇଟିଭି ଭାରତ ପହଞ୍ଚି ପୂରା ଘଟଣା ସମ୍ପର୍କରେ ଅନୁଧ୍ୟାନ କରିଥିଲା ।
କଣ୍ଟାମାଳ ବ୍ଲକ ସଦର ମହକୁମାଠାରୁ ମାତ୍ର ଦୁଇ କିଲୋମିଟର ଦୂରରେ 6,52,60,638 ଟଙ୍କା ବ୍ୟୟ ଅଟକଳରେ ଜଳସମ୍ପଦ ବିଭାଗ ପକ୍ଷରୁ ନିର୍ମିତ ହୋଇଛି ବୃହତ ଉଠା ଜଳସେଚନ ପ୍ରକଳ୍ପ । ଏଲଏଣ୍ଡଟି ଦ୍ବାରା ନିର୍ମିତ ଏହି ପ୍ରକଳ୍ପରୁ 1500 ହେକ୍ଟର ଜମିକୁ ଜଳସେଚନର ଲକ୍ଷ୍ୟ ରଖାଯାଇଥିଲା । କିନ୍ତୁ ଆମ ଇଟିଭି ଭାରତ ପ୍ରତିନିଧି ଯେତେବେଳେ ପ୍ରକଳ୍ପ ନିକଟସ୍ଥ ଉଦୟପୁର ଗାଁରେ ପହଞ୍ଚିଥିଲେ ସେଠାରେ ଏବେବି ଚାଷ ପାଇଁ କିଭଳି ଜଳକଷ୍ଟ ଭୋଗୁଛନ୍ତି ତାର ବର୍ଣ୍ଣନା କରିଥିଲେ ଅଞ୍ଚଳବାସୀ ।
ଏ ସମ୍ପର୍କରେ ଅଭିଯୋଗ କଲେ ଓଲଟା ପୋଲିସ ଦ୍ଵାରା କେସର ଭୟ ଦେଖାଉଥିବା ଅଭିଯୋଗ କରିଛନ୍ତି ଗ୍ରାମବାସୀ । ତେବେ ସମସ୍ୟା ସମ୍ପର୍କରେ କଣ୍ଟାମାଳ ତହସିଲଦାର ଓ ବୌଦ୍ଧ ଜିଲ୍ଲାପାଳଙ୍କୁ ଗୁହାରି ମଧ୍ୟ କରିଛନ୍ତି ଅଞ୍ଚଳବାସୀ। କିନ୍ତୁ ଏପର୍ଯ୍ୟନ୍ତ ସମସ୍ୟାର ସମାଧାନ ହୋଇନାହିଁ । ତେଣୁ ତୁରନ୍ତ ଏ ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ସମସ୍ୟାର ସମାଧାନ କରିବାକୁ ଅଞ୍ଚଳବାସୀ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
