ବୌଦ୍ଧ: ଅସ୍ବାସ୍ଥ୍ୟକର ପରିବେଶ ମଧ୍ୟରେ ବୌଦ୍ଧ ଜିଲ୍ଲା ଜହ୍ନାପଙ୍ଗର ଉପ ସ୍ବାସ୍ଥ୍ୟକେନ୍ଦ୍ର । ଜନସାଧାରଣଙ୍କ ସ୍ବାସ୍ଥ୍ୟ ପରୀକ୍ଷା ପାଇଁ ସରକାର ବିଭିନ୍ନ ସ୍ଥାନରେ ଖୋଲିଛନ୍ତି ଉପ ସ୍ବାସ୍ଥ୍ୟକେନ୍ଦ୍ର । କିନ୍ତୁ କର୍ମଚାରୀଙ୍କ ମନମୁଖୀ କାର୍ଯ୍ୟ ପାଇଁ ଭୂତକୋଠୀ ପାଲଟିବାକୁ ବସିଲାଣି ସ୍ବାସ୍ଥ୍ୟ କେନ୍ଦ୍ର ।
ବୌଦ୍ଧ ଜିଲ୍ଲା ଖୁଣ୍ଟବନ୍ଧ ପଞ୍ଚାୟତ ଅନ୍ତର୍ଗତ ଜହ୍ନାପଙ୍ଗ ଗ୍ରାମରେ ଲୋକଙ୍କ ସୁବିଧା ପାଇଁ ସରକାର ଉପ ସ୍ବାସ୍ଥ୍ୟକେନ୍ଦ୍ର ଖୋଲିଛନ୍ତି । କିନ୍ତୁ ପ୍ରାୟ ଦୁଇ ବର୍ଷ ହେଲା ଏଠାରେ ତାଲା ପଡି ରହିଥିବା ଅଭିଯୋଗ ହୋଇଛି । ଏଥିସହ ଏଠାରେ ନିଯୁକ୍ତ କର୍ମଚାରୀ ଏହି ଉପ ସ୍ବାସ୍ଥ୍ୟକେନ୍ଦ୍ରକୁ ନଖୋଲି ମନ ଇଛା କାର୍ଯ୍ୟ କରୁଥିବା ଅଭିଯୋଗ କରିଛନ୍ତି ।
ଏହାଛଡା ଉପ ସ୍ବାସ୍ଥ୍ୟକେନ୍ଦ୍ରଟି ଖୋଲା ଯାଉନଥିବାରୁ ଏହାର ପରିବେଶ ମଧ୍ୟ ଅସ୍ବାସ୍ଥ୍ୟକର ହୋଇ ପଡିଲାଣି । ତୁରନ୍ତ ଏଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।
ଏସମ୍ପର୍କରେ ଆମ ଈଟିଭି ଭାରତ ପ୍ରତିନିଧି ଉପ ସ୍ବାସ୍ଥ୍ୟକେନ୍ଦ୍ର ଦାୟିତ୍ବରେ ଥିବା କର୍ମଚାରୀଙ୍କୁ ପଚାରିବାରୁ ସ୍ବାସ୍ଥ୍ୟକେନ୍ଦ୍ରର କୋଠା ଦୁର୍ବଳ ହୋଇପଡିବା ଯୋଗୁଁ ସେ ମଝିରେ ମଝିରେ ସେଠାରେ କାର୍ଯ୍ୟ କରି ଅନ୍ୟ ସମୟରେ ପରିସର ଗାଁ ଗୁଡିକରେ ପହଞ୍ଚି ସ୍ବାସ୍ଥ୍ୟ ସେବା ଯୋଗାଉଛନ୍ତି ବୋଲି କହିଛନ୍ତି । ଏଥିସହ ଅତିଶୀଘ୍ର ଏହି ସମସ୍ୟାର ସମାଧାନ ହେବ ବୋଲି ସେ କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
