ବୌଦ୍ଧ: କଣ୍ଟାମାଳ ବ୍ଲକର ମନମୁଣ୍ଡା ଅଞ୍ଚଳର ବିଭିନ୍ନ ସମସ୍ୟା ସମ୍ପର୍କରେ ଜିଲ୍ଲାପାଳଙ୍କ ସହିତ ଆଲୋଚନା କଲା ନାଗରିକ ମଞ୍ଚ । ଜିଲ୍ଲାର ଅନ୍ୟତମ ପ୍ରମୁଖ ବାଣିଜ୍ୟ କେନ୍ଦ୍ର କଣ୍ଟାମାଳ ବ୍ଲକର ମନମୁଣ୍ଡା । କିନ୍ତୁ ଏବେ ଚରମ ଅବହେଳିତ ଅବସ୍ଥାରେ ଥିବା ନାଗରିକ ମଞ୍ଚ ଜିଲ୍ଲାପାଳଙ୍କ ନିକଟରେ ଅବଗତ କରାଇଛି । ବିଶେଷ ଭାବରେ ଡାକ୍ତରଖାନାରେ ବିଶେଷଜ୍ଞ ଡାକ୍ତରଙ୍କ ଅଭାବ ଯୋଗୁଁ ସ୍ବାସ୍ଥ୍ୟ ସେବା ଏକପ୍ରକାର ବିପର୍ଯ୍ୟସ୍ତ ହୋଇ ପଡ଼ିଥିବା ବେଳେ ପାନୀୟଜଳ ଠାରୁ ନେଇ ବିଭିନ୍ନ ମୌଳିକ ସମସ୍ୟା ସମ୍ପର୍କରେ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଛି ନାଗରିକ ମଞ୍ଚ ।
ଦୁଇଟି ନଦୀର ସଙ୍ଗମ ସ୍ଥଳରେ ଅବସ୍ଥିତ ଏକ ପ୍ରାଚୀନ ବାଣିଜ୍ୟିକ ପେଣ୍ଠସ୍ଥଳୀ ମନମୁଣ୍ଡା ବର୍ତ୍ତମାନ ଅତ୍ୟନ୍ତ ଅବହେଳିତ ହୋଇ ପଡିଥିବା ଅଭିଯୋଗ ହୋଇଛି । ଏନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ପ୍ରଶାସନିକ ଉଦାସୀନତା ତଥା ରାଜନୈତିକ ଇଚ୍ଛାଶକ୍ତିର ଅଭାବରୁ ଉକ୍ତ ଐତିହାସିକ ଅଞ୍ଚଳର ବିକାଶ ଠିକରେ ହୋଇ ପାରୁନାଥିବା ନାଗରିକ ମଞ୍ଚ ଅଭିଯୋଗ କରିଛି । ମନମୁଣ୍ଡା ଏକ ପଞ୍ଚାୟତ ହୋଇଥିଲେ ମଧ୍ୟ ଏହା ଉପରେ ଦଶରୁ ଊର୍ଦ୍ଧ୍ବ ପଞ୍ଚାୟତବାସୀ ନିର୍ଭରଶୀଳ । କିନ୍ତୁ ବର୍ତ୍ତମାନ ମନମୁଣ୍ଡା ଅଞ୍ଚଳ ଅତ୍ୟନ୍ତ ଅବହେଳିତ ହୋଇ ପଡିଥିବା ଅଭିଯୋଗ ହୋଇଛି ।
ମନମୁଣ୍ଡା ନାଗରିକ ମଞ୍ଚ ସଦସ୍ୟ କହିଛନ୍ତି, ‘‘ମହାନଦୀ ଓ ତେଲନଦୀ କୂଳରେ ଅବସ୍ଥିତ ମନମୁଣ୍ଡାରେ ପାନୀୟଜଳର ଦୀର୍ଘ ବର୍ଷ ହେଲା ସମସ୍ୟା ରହିଆସିଛି । ଦୀର୍ଘ ଦିନର ଦାବି ପରେ ମନମୁଣ୍ଡା ବାଏପାସ ରାସ୍ତା ନିର୍ମାଣ ହୋଇଥିଲେ ମଧ୍ୟ ଏଠାରେ ଆଜି ପର୍ଯ୍ୟନ୍ତ ଲାଇଟର ସମସ୍ୟା ହେତୁ ଦୁର୍ଘଟଣା ଓ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଛି । ଗାନ୍ଧୀ ଛକ ନିକଟରେ ତେଲନଦୀ କୂଳରେ ନିର୍ମାଣ ହେଉଥିବା ବୁଦ୍ଧ ପାର୍କର ଅବସ୍ଥା ନକହିବା ଭଲ । ଏକଦା ସ୍ବାସ୍ଥ୍ୟ ସେବା କ୍ଷେତ୍ରରେ ମନମୁଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ବେଶ ସୁନାମ ରହିଥିବା ବେଳେ ବର୍ତ୍ତମାନ ଏଠାରେ ବିଶେଷଜ୍ଞ ଡାକ୍ତରଙ୍କ ଅଭାବ ଯୋଗୁଁ ସ୍ବାସ୍ଥ୍ୟ ସେବା ଏକପ୍ରକାର ବିପର୍ଯ୍ୟସ୍ତ ହୋଇ ପଡ଼ିଥିବା ରହିଛି । ଶିଶୁ ମହିଳା, ପ୍ରସୂତି ଭଳି ବିଭିନ୍ନ ବିଭାଗର ବିଶେଷଜ୍ଞ ଡାକ୍ତର ପଦବୀ ଦୀର୍ଘ ଦିନ ହେଲା ଖାଲି ପଡିଛି ।’’
ସେହିପରି ବୌଦ୍ଧ ନାଗରିକ କମିଟି ପକ୍ଷରୁ ମଧ୍ୟ ଜିଲ୍ଲାର ତଥା ଏକମାତ୍ର ପୌରାଞ୍ଚଳରେ ରହିଥିବା ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରାଯାଇଥିଲା । ସ୍ବଚ୍ଛ ପାନୀୟଜଳ, ମ୍ୟୁନିସିପାଲିଟିର ମାନ୍ୟତା, ମହାବିଦ୍ୟାଳୟ, କେନ୍ଦ୍ରୀୟ ବିଦ୍ୟାଳୟ, ପର୍ଯ୍ୟଟନ, ସଂସ୍କୃତି ସମ୍ପର୍କରେ ବିସ୍ତୃତ ଆଲୋଚନା କରାଯାଇଥିଲା ।
ଇଟିଭି ଭାରତ, ଇଟିଭି ଭାରତ
