ବୌଦ୍ଧ: ସମସ୍ୟା ଭିତରେ ଛନ୍ଦି ହୋଇ ରହିଛି ପଞ୍ଚାୟତ । ଜାତୀୟ ରାଜପଥ ଠାରୁ ନେଇ ମହାନଦୀ ପର୍ଯ୍ୟନ୍ତ ବିସ୍ତୃତ ପଞ୍ଚାୟତ ନାନା ସମସ୍ୟା ଘେରରେ ରହିଛି । ବୌଦ୍ଧ ଜିଲ୍ଲା ସଦର ବ୍ଲକ ଅନ୍ତର୍ଗତ ତେଲିବନ୍ଧ ପଞ୍ଚାୟତ ରାସ୍ତାକୁ ଦେଖିଲେ ଏହାର ବାସ୍ତବ ଚିତ୍ର ଜଣାପଡ଼େ । ଆରଡି ବିଭାଗ ଅଧୀନରେ ଥିବା ଏହି ରାସ୍ତାରେ ବର୍ଷା ଦିନରେ ଆଣ୍ଠୁଏ ଉଚ୍ଚର ନର୍ଦ୍ଦମା ପାଣି ଲହଡି ମାରୁଥିବା ବେଳେ ପ୍ରାଣୀଧନ ଚିକିତ୍ସା କେନ୍ଦ୍ର ଦୀର୍ଘ ବର୍ଷ ହେଲା ଅଚଳ ହୋଇ ପଡିରହିଛି ।
ଏଠାରେ ଥିବା ପ୍ରାଚୀନ ଡାକ ବଙ୍ଗଳାର ପୁନରୁଦ୍ଧାରର ଯଥେଷ୍ଟ ଆବଶ୍ୟକତା ରହିଥିବା ବେଳେ ରାଜପଥ କଡରେ ଥିବା ମାର୍କେଟ କମ୍ପ୍ଲେକ୍ସକୁ ନେଇ ସମସ୍ୟା ରହିଛି । ଏହାଛଡା ତେଲିବନ୍ଧ ପଞ୍ଚାୟତର କଲ୍ୟାଣ ମଣ୍ଡପରେ ଦଶ ଲକ୍ଷ ଟଙ୍କା ଖର୍ଚ୍ଚ ହୋଇଥିଲେ ମଧ୍ୟ ତାହା ଅଦ୍ୟାବଧି ଅଧପନ୍ତରିଆ ହୋଇ ପଡିରହିଛି । ସେପଟେ ପାଞ୍ଚ ଲକ୍ଷ ଟଙ୍କା ବ୍ୟୟରେ ନିର୍ମିତ ମିଶନ ଶକ୍ତି ଗୃହ କାର୍ଯ୍ୟକ୍ଷମ ହେବା ପୂର୍ବରୁ ଅନେକ ସ୍ଥାନରେ ଫାଟି ଆଁ କଲାଣି । ସମସ୍ୟାର ଲମ୍ବା ତାଲିକା ତେଲିବନ୍ଧରେ ରହିଥିବା ବେଳେ ଏନେଇ ପ୍ରତିକ୍ରିୟା ରଖିଛନ୍ତି ସ୍ଥାନୀୟ ସରପଞ୍ଚ ।
ଇଟିଭି ଭାରତ, ବୌଦ୍ଧ
