ବୌଦ୍ଧ: ମହାନଦୀରେ କୁମ୍ଭୀର ଆତଙ୍କ । ତେବେ ନଦୀକୂଳିଆ ଅଞ୍ଚଳରେ ଗତ ଦୁଇ ଦିନ ହେଲା ଏକାଧିକ କୁମ୍ଭୀର ଦେଖାଯାଉଥିଲେ ମଧ୍ୟ ଏନେଇ ଜଙ୍ଗଲ ବିଭାଗ ପକ୍ଷରୁ କୌଣସି ତତ୍ପରତା ପ୍ରକାଶ ପାଇନାହିଁ ।
ବୌଦ୍ଧ ଜିଲ୍ଲାର ହରଭଙ୍ଗା ଠାରୁ ଆରମ୍ଭ କରି ବୌଦ୍ଧ ପର୍ଯ୍ୟନ୍ତ ମହାନଦୀ କୂଳିଆ ଲୋକେ କୁମ୍ଭୀର ଯୋଗୁଁ ଆତଙ୍କିତ ହୋଇପଡିଛନ୍ତି । ମହାନଦୀରେ ବନ୍ୟା ପାଣିରେ ତଳ ମୁଣ୍ଡରେ ଥିବା ଟିକରପଡା ଅଞ୍ଚଳରୁ କୁମ୍ଭୀର ଚାଲିଆସିଥିବା ଆଲୋଚନା ହେଉଛି ।
ତେବେ ଏହା ଗୋଟିଏ କୁମ୍ଭୀର ନା ଅଧିକ ତାହା ସ୍ପଷ୍ଟ ସୂଚନା ମିଳିପାରି ନାହିଁ । ତେବେ ଧଳପୁର, ହରଭଙ୍ଗା, କରଡି, ବଙ୍କାପଡା ଭଳି ନଦୀକୂଳିଆ ଲୋକମାନେ କୁମ୍ଭୀର ଆତଙ୍କ ଯୋଗୁଁ ନଦୀକୁ ଭୟରେ ଗାଧୋଇବାକୁ ଯାଉ ନାହାଁନ୍ତି ।
କରଡି ମହାଦେବ ମନ୍ଦିର ଘାଟରେ ଦୀର୍ଘ ସମୟ ପର୍ଯ୍ୟନ୍ତ କୁମ୍ଭୀରଟି ରହିଥିବା ବେଳେ ଶନିବାର ଆହୁରି ଉପରକୁ ଆସିଥିବା ଅନୁମାନ କରାଯାଉଛି । ତେବେ କୁମ୍ଭୀର ଘଡିଆଳ ପ୍ରଜାତିର ହୋଇଥିବା ଅନୁମାନ କରାଯାଉଛି । ସେପଟେ ଜଙ୍ଗଲ ବିଭାଗ ପାଖରେ କିନ୍ତୁ ଏନେଇ କୌଣସି ସୂଚନା ନଥିବାରୁ ତୁରନ୍ତ ଏଦିଗରେ ବିଭାଗ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
