ବୌଦ୍ଧ: ଜିଲ୍ଲାର ଜୁନିୟର ଶିକ୍ଷକଙ୍କ ଦରମା ବୃଦ୍ଧି ଦାବି । ଗୋଟିଏ ପଟରେ ଜିଲ୍ଲାର 32 ଗୋଟି ବିଦ୍ୟାଳୟ 5T ଅନ୍ତର୍ଗତ ପାଇଁ ବୈଠକ ଚାଲିଥିବା ବେଳେ ବାହାରେ ଜୁନିୟର ଶିକ୍ଷକ ଶିକ୍ଷୟିତ୍ରୀ ସେମାନଙ୍କ ଦରମା ବୃଦ୍ଧି ପାଇଁ ଆନ୍ଦୋଳନ କରିଥିଲେ ।
ମଙ୍ଗଳବାର ବୌଦ୍ଧ ଜିଲ୍ଲାପାଳଙ୍କ କାର୍ଯ୍ୟାଳୟ ଭିତରେ 5T ବିଦ୍ୟାଳୟ ପାଇଁ ବୈଠକ ଚାଲିଥିଲା । ଆଉ ବାହାରେ ଜିଲ୍ଲାର ଜୁନିୟର ଶିକ୍ଷକମାନେ ସେମାନଙ୍କ ଦରମା ବୃଦ୍ଧି ପାଇଁ ଆନ୍ଦୋଳନ ଚଳାଇଥିଲେ । ବୌଦ୍ଧ ଜିଲ୍ଲାରେ ପୂର୍ବରୁ 10 ଗୋଟି ବିଦ୍ୟାଳୟ କୁ 5T ରେ ରୂପାନ୍ତରିତ ପାଇଁ କାର୍ଯ୍ୟ ସମ୍ପୂର୍ଣ୍ଣ ହୋଇସାରିଥିବା ବେଳେ ବର୍ତ୍ତମାନ ପୁଣିଥରେ ନୂତନ 32 ଗୋଟି ବିଦ୍ୟାଳୟ 5T ରେ ରୂପାନ୍ତରିତ ପାଇଁ ବୈଠକ ଅନୁଷ୍ଠିତ ହୋଇଥିଲା । ବୌଦ୍ଧ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଜିଲ୍ଲାର ତିନୋଟି ବ୍ଲକର ବିଭିନ୍ନ ବିଦ୍ୟାଳୟରୁ ଶିକ୍ଷକ ଶିକ୍ଷୟିତ୍ରୀ, ନିର୍ବାଚିତ ପ୍ରତିନିଧି, ଛାତ୍ରଛାତ୍ରୀ ଯୋଗ ଦେଇଥିଲେ ।
ସେପଟେ ଜିଲ୍ଲାପାଳଙ୍କ କାର୍ଯ୍ୟାଳୟ ବାହାରେ ଜିଲ୍ଲାର 73 ଜଣ ଶିକ୍ଷକ ଶିକ୍ଷୟିତ୍ରୀ ସେମାନଙ୍କ ଦରମା ବୃଦ୍ଧି ଦାବି କରି ବିକ୍ଷୋଭ ପ୍ରଦର୍ଶନ କରିବା ସହିତ ଜିଲ୍ଲାପାଳଙ୍କ ଜରିଆରେ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରିଥିଲେ । ଦୀର୍ଘ ଚାରି ବର୍ଷ ହେଲା ଶିକ୍ଷକ ମାନେ ନିଯୁକ୍ତି ପାଇଥିଲେ ମଧ୍ୟ ସରକାର ସେମାନଙ୍କ ଦାବି ପୂରଣ ନେଇ ଟାଳଟୁଳ ନୀତି ଅବଲମ୍ବନ କରୁଥିବା ଅଭିଯୋଗ କରି ଶିକ୍ଷକମାନେ ତୁରନ୍ତ ସରକାର ଏ ଦିଗରେ ପଦକ୍ଷେପ ଗ୍ରହଣ ପାଇଁ ଦାବି କରାଯାଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
