ବୌଦ୍ଧ: ଜିଲ୍ଲାରେ ଆରମ୍ଭ ହୋଇଗଲାଣି ଖରିଫ ଚାଷ କାର୍ଯ୍ୟ । ଖରିଫ ଋତୁର ଚାଷ ପାଇଁ ଚାଷୀ ମହଲରେ ଚଳଚଞ୍ଚଳ ଦେଖା ଦେଇଛି । ତେବେ ଜିଲ୍ଲାକୁ ଖରିଫ ଚାଷ ପାଇଁ ୟୁରିଆ ସାର ଅଳ୍ପ ପରିମାଣରେ ଆସିଛି । ଫଳରେ ସାରର ଅଭାବୀ ବିକ୍ରି ନେଇ ଉଦବେଗ ପ୍ରକାଶ କରିଛନ୍ତି ଚାଷୀ । ଚଳିତ ବର୍ଷ ଜିଲ୍ଲାରେ ଭଲ ବର୍ଷା ହୋଇଛି । ଖରିଫ ଚାଷ ପାଇଁ ଚାଷୀ ଚଳଚଞ୍ଚଳ ହୋଇପଡିଛି । ବର୍ଷା ଭଲ ହୋଇ ଥିବାରୁ ଖରିଫ ଋତୁରେ ଚାଷ ଭଲ ହେବ ବୋଲି ଚାଷୀ ଆଶା ରଖିଛି ।
ଚାଷୀଙ୍କ ପାଇଁ ଜିଲ୍ଲାକୁ ଆସିଛି ୟୁରିଆ ସାର । ଏନେଇ ବିଭିନ୍ନ ସମବାୟ ସମିତିରେ ଚାଷୀ ପଞ୍ଜିକରଣ ପ୍ରକ୍ରିୟା ଜାରି ରହିଛି । ବୌଦ୍ଧ ଜିଲ୍ଲାର 42 ଗୋଟି ସମବାୟ ସମିତିରେ ବର୍ତ୍ତମାନ ସୁଦ୍ଧା ୟୁରିଆ ସାର ପହଞ୍ଚି ପାରି ନଥିବାବେଳେ ମାର୍କଫେଡ ଗୋଦାମରେ ବର୍ତ୍ତମାନ କେବଳ ଆବଶ୍ୟକତାର କୋଡିଏ ପ୍ରତିଶତ ୟୁରିଆ ସାର ପହଞ୍ଚିଛି । ସେପଟେ ଖରିଫ ଚାଷ କାର୍ଯ୍ୟ ଜୋରସୋରରେ ଚାଲିଛି । ଏବେଠୁ ଜିଲ୍ଲାରେ ୟୁରିଆ ସାରର ଅଭାବ ପରିଲକ୍ଷିତ ହୋଇଛି ।
ତେବେ ବିଗତ ବର୍ଷ ଭଳି ଚଳିତ ବର୍ଷ ମଧ୍ୟ ଧଳା ୟୁରିଆ ସାର କଳା ବଜାରୀ ହେବା ନେଇ ଆଶଙ୍କା ସୃଷ୍ଟି କରିଛନ୍ତି ଚାଷୀ । କଳା ବଜାରୀରେ ୟୁରିଆ ସାର କିଣିଲେ ଚାଷୀ ମାନଙ୍କୁ ଅଧିକ ଟଙ୍କା ଦେଇ କିଣିବାକୁ ପଡୁଥିବା ଚାଷୀ ମହଲରେ ଉଦବେଗ ପ୍ରକାଶ ପାଇଛି । ଫଳରେ ୟୁରିଆ ସାରର ଆଭାବୀ ବିକ୍ରି ଏବଂ କଳା ବଜାରୀ ରୋକିବାକୁ ଜିଲ୍ଲା ପ୍ରଶାସନ ଓ କୃଷି ବିଭାଗ ପଦକ୍ଷେପ ଗ୍ରହଣ କରିବାକୁ ଚାଷୀମାନେ ଦାବି କରିଛନ୍ତି ।
ଇଟିଭି ଭାରତ, ବୌଦ୍ଧ
