ବୌଦ୍ଧ: ଏକ କିଲୋମିଟର ରାସ୍ତା ନିର୍ମାଣର ଅବଧି ଏକାଧିକ ବାର ସରିଯାଉଛି । ହେଲେ ବିଭାଗ ମଧ୍ୟରେ ସମନ୍ବୟ ଅଭାବରୁ କେବଳ ଖୋଳାପୋତାରେ ଚାଲିଛି ରାସ୍ତା ନିର୍ମାଣ କାର୍ଯ୍ୟ । ବୌଦ୍ଧ ଜିଲ୍ଲା ସଦର ମହକୁମା ଏନଏସି ଛକ ଠାରୁ ଜାମୁଛକ ପର୍ଯ୍ୟନ୍ତ ମାତ୍ର ଏକ କିଲୋମିଟର ରାସ୍ତା ନିର୍ମାଣ ସମ୍ପୂର୍ଣ୍ଣ କେବେ ହେବ ତାର ସେ ନେଇ ଉଠିଛି ପ୍ରଶ୍ନବାଚୀ । ଏହି ଗୁରୁତ୍ବପୂର୍ଣ୍ଣ ରାସ୍ତାକୁ ଚାରି ଲେନ ବିଶିଷ୍ଟ ନିର୍ମାଣ ନିମନ୍ତେ ଅବଧି ପରେ ଅବଧି ସରିଯାଉଛି । ହେଲେ ସମ୍ପୂର୍ଣ୍ଣ ହୋଇପାରୁ ନାହିଁ ରାସ୍ତା ନିର୍ମାଣ କାର୍ଯ୍ୟ ।
ରାସ୍ତା ନିର୍ମାଣ ପାଇଁ ପର୍ଯ୍ୟାପ୍ତ ଜାଗା ରହିଥିଲେ ମଧ୍ୟ ଅଙ୍କାବଙ୍କା ହୋଇ ନାଳ ନିର୍ମାଣ ସମ୍ପୂର୍ଣ୍ଣ ଭୁଲ, ପାନୀୟଜଳ ପାଇପ ବିଛା, ବିଦ୍ୟୁତ ଖୁଣ୍ଟ ପୋତା ଓ ସର୍ବୋପରି ରାସ୍ତା ମଝିରେ ହ୍ୟୁମ ପାଇପ ଯୋଗେ ସହରର ମଇଳା ପାଣିକୁ ଭୂତଳେ ନିଷ୍କାସନ ବ୍ୟବସ୍ଥାକୁ ବୌଦ୍ଧ ବାସୀ ଗ୍ରହଣ କରିପାରୁ ନାହାନ୍ତି ।
ସେପଟେ ବିଭାଗ ମଧ୍ୟରେ ସମନ୍ବୟ ଅଭାବରୁ ଖୋଳାପୋତାରେ ଚାଲିଛି ଏହି ଏକ କିଲୋମିଟର ରାସ୍ତା ସଂପ୍ରସାରଣ କାର୍ଯ୍ୟ । ଏବେ ଏଭଳି ଅପନ୍ତରିଆ ତଥା ବିଳମ୍ବିତ କାର୍ଯ୍ୟ ଉପରେ ବୁଦ୍ଧିଜୀବୀ ପ୍ରଶ୍ନବାଚୀ ସୃଷ୍ଟି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
