ବୌଦ୍ଧ: ମଝି ନଦୀରେ ବୁଡି ଗଲା ଡଙ୍ଗା , ଅଳ୍ପକେ ବର୍ତ୍ତିଲେ ଦୁଇ ଯାତ୍ରୀ । ମହାନଦୀର ମିର୍ଜାକୁଦ ଦ୍ବୀପରେ ସାର ଓ ପିଡିଏସ ଚାଉଳ ନେଇ ଯାଉଥିବାବେଳେ ନଦୀମଝିରେ ଡଙ୍ଗା ବୁଡିଯାଇଥିଲା ।
ସୂଚନା ଅନୁଯାୟୀ ବୌଦ୍ଧ ପୌରାଞ୍ଚଳର ମହାନଦୀ ଗର୍ଭରେ ଥିବା ମର୍ଜାକୁଦ ଦ୍ବୀପରୁ ଶୁକ୍ରବାର ଦୁଇ ଜଣ ଗ୍ରାମବାସୀ ଚାଷ ପାଇଁ ସାର ଓ ପିଡିଏସ ଚାଉଳ ନେଇ ଡଙ୍ଗାରେ ଫେରୁଥିଲେ । ଏହି ସମୟରେ ପୋଡାପୋଡା ସ୍ଥିତ ସନ୍ତୋଷୀ ମନ୍ଦିର ଘାଟରୁ ଡଙ୍ଗା ଧରି ଫେରୁଥିବା ସମୟରେ ମଝି ନଦୀରେ ଡଙ୍ଗାଟି ବୁଡି ଯାଇଥିଲା । ଫଳରେ ସମସ୍ତ ସାମଗ୍ରୀ ସହ ଡଙ୍ଗାଟି ସମ୍ପୂର୍ଣ୍ଣ ବୁଡି ଯାଇଥିଲା । କିନ୍ତୁ ସୌଭାଗ୍ୟ ବଶତଃ ଉକ୍ତ ଦୁଇ ଯାତ୍ରୀ ଭାସିଯାଇ ନଦୀ ମଝିରେ ଥିବା ପଥର ଟାପୁରେ ଲାଗିଯାଇଥିଲେ ମୃତ୍ୟୁ ମୁଖରୁ ଅଳ୍ପକେ ବର୍ତ୍ତି ଯାଇଥିଲେ ।
ଘଟଣାସ୍ଥଳରେ ବୌଦ୍ଧ ଅଗ୍ନିଶମ ବିଭାଗ, ପୋଲିସ ଓ ଆପତ୍ତକାଳୀନ ବିଭାଗର କର୍ମଚାରୀ ପହଞ୍ଚି ସେମାନଙ୍କୁ ମର୍ଜାକୁଦ ପଟରୁ ଦୁଇଟି ଡଙ୍ଗା ଦ୍ବାରା ଉଦ୍ଧାର କରାଯାଇଛି । ତେବେ ବିଭିନ୍ନ ସମୟରେ ଏଭଳି ଅଘଟଣ ଘଟୁଥିବାରୁ ମର୍ଜାକୁଦ ସେତୁ ନହେବା ପର୍ଯ୍ୟନ୍ତ ଏକ ମୋଟର ଲଞ୍ଚ ଯୋଗାଇ ଦେବାକୁ ଦାବୀ ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
