ବୌଦ୍ଧ: କାର୍ଯ୍ୟରେ ଅବହେଳା ପ୍ରଦର୍ଶନ କରି ଫସିଲେ ରାଜସ୍ବ ନିରୀକ୍ଷକ । ଧାନ ପଞ୍ଜିକରଣ କାର୍ଯ୍ୟରେ ସହଯୋଗ ନକରିବାରୁ 28 ଜଣ ଚାଷୀ, ରବିଧାନ ବିକ୍ରି କରିନପାରିବା ଘଟଣାକୁ ନେଇ ଆରଆଇଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । କୃଷି ବିଭାଗଠାରୁ ସମବାୟ ବିଭାଗ ଓ ରାଜସ୍ବ ବିଭାଗ, ସମସ୍ତଙ୍କ ଗୋଚରରେ ଚାଲିଛି ଚାଷୀଙ୍କ ଭାଗ୍ୟ ନିର୍ଦ୍ଧାରଣ ।
ବ୍ୟାପକ ଦୁର୍ନୀତିରେ ବୁଡି ରହିଥିବା ବୌଦ୍ଧ ଜିଲ୍ଲାର କୃଷି ବିଭାଗ ଓ ରାଜସ୍ବ ବିଭାଗର କେତେକ ଦୁର୍ନୀତି ଗ୍ରସ୍ତ କର୍ମଚାରୀଙ୍କ ସହ ସମବାୟ ବିଭାଗର କିଛି ଦଲାଲ ଧାନ ପଞ୍ଜିକରଣ ନାରେ ବ୍ୟାପକ ଅନିୟମିତତା କାର୍ଯ୍ୟ କରୁଥିବା ବାରମ୍ବାର ଅଭିଯୋଗ ହୋଇଆସୁଛି । ଗତ ଖରିଫ ସମୟରେ ଏଭଳି ଦୁର୍ନୀତି ଯୋଗୁଁ ବୌଦ୍ଧ ଜିଲ୍ଲାପାଳ ପାଞ୍ଚ ଜଣ ସମବାୟ ସମିତିର ସମ୍ପାଦକଙ୍କୁ ନିଲମ୍ବିତ କରିଥିଲେ । ବର୍ତ୍ତମାନ ପୁଣିଥରେ ରବିଧାନ ପଞ୍ଜିକରଣ କାର୍ଯ୍ୟରେ ଜଣେ ଆରଆଇଙ୍କ ଚରମ ଅବହେଳା ସମ୍ମୁଖକୁ ଆସିଛି ।
ମଣ୍ଡିର 28 ଜଣ ଚାଷୀଙ୍କ ପଞ୍ଜିକରଣ କାର୍ଯ୍ୟରେ ସହଯୋଗ କରିନଥିବାରୁ ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଘଣ୍ଟାପଡା ଆରଆଇଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ବୌଦ୍ଧ ଜିଲ୍ଲାପାଳ କଣ୍ଟାମାଳ ତହସିଲଦାରଙ୍କୁ ନିର୍ଦ୍ଦେଶ ଦେଇଥିବା ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
