ବୌଦ୍ଧ: ସ୍ବାର୍ଥପର ଦୁନିଆରେ ଅନ୍ୟ ମାନଙ୍କ କଥା ଭାବିବା ପାଇଁ କାହାକୁ ସମୟ ନାହିଁ । ସାହାଯ୍ୟ କଥା ଉଠିଲେ ମୁହଁମୋଡି ଚାଲିଯାଆନ୍ତି ସମସ୍ତେ । କିନ୍ତୁ ଆଜି ବି ବଞ୍ଚିଛି ମାନବିକତା । ତାହା ପ୍ରମାଣିତ କରି ଦେଖାଇଛନ୍ତି ବୌଦ୍ଧ ଜିଲ୍ଲାର ଗଙ୍ଗାଧର ମେହେର ନାମକ ଏକ ସ୍ବେଚ୍ଛାସେବୀ ସଙ୍ଗଠନ ।
ଏହି ସଂଗଠନର କର୍ମକର୍ତ୍ତା ଏକ ଅଜଣା ମୃତଦେହକୁ ଅନ୍ତିମ ସଂସ୍କାର କରିଛନ୍ତି । ଯାହା ବର୍ତ୍ତମାନ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ଗତ ଗୁରୁବାର ଜିଲ୍ଲା ମୁଖ୍ୟଚିକିତ୍ସାଳୟରେ ଜଣେ ଅଜଣା ବ୍ୟକ୍ତିଙ୍କୁ ମୂର୍ମୂଷ ଅବସ୍ଥାରେ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲା ଅଗ୍ନିଶମ ବିଭାଗ । ହେଲେ ଚିକିତ୍ସାଧିନ ଅବସ୍ଥାରେ ଶନିବାର ବୃଦ୍ଧଙ୍କ ମୃତ୍ୟୁ ଘଟିଥିଲା । ବୃଦ୍ଧଙ୍କ କୌଣସି ସମ୍ପର୍କୀୟ ନଥିବାରୁ ମେଡିକାଲର ଡାଇରିଆ ୱାର୍ଡରେ ପଡି ରହିଥିଲା ମୃତଦେହଟି । ଖବର ପାଇ ଏହି ସଙ୍ଗଠନ ମୃତଦେହକୁ ଅନ୍ତିମ ସଂସ୍କାର କରିଥିଲେ । ସଙ୍ଗଠନର ଏହି କାର୍ଯ୍ୟକୁ ସବୁ ମହଲରେ ପ୍ରଶଂସା କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
