ବୌଦ୍ଧ: ବ୍ୟାଙ୍କ ଡକାୟତି ପାଇଁ ଯୋଜନା କରୁଥିବା ଏକ ଡକାୟତ ଗ୍ୟାଙ୍ଗର 3 ଜଣଙ୍କୁ ଗିରଫ କରିଛି ବୌଦ୍ଧ ପୋଲିସ । ଘଟଣାରେ ଅନ୍ୟ ଦୁଇ ଜଣ ଡକାୟତ ଫେରାର ହୋଇଯାଇଥିବା ସୂଚନା ମିଳିଛି । ବୌଦ୍ଧ ଥାନା ଅନ୍ତର୍ଗତ ଜହ୍ନାପଙ୍କ ଫାଣ୍ଡି ଅଞ୍ଚଳରେ ଥିବା ଭାରତୀୟ ଷ୍ଟେଟ ବ୍ୟାଙ୍କରୁ ଡକାୟତି ପାଇଁ ଯୋଜନା କରୁଥିଲା ଏହି ଡକାୟତ ଗ୍ୟାଙ୍ଗ୍ ।
ପଦ୍ମନପୁର ପଞ୍ଚାୟତର ତୁଳସୀପୁର ବାଇପାସ ନିକଟରେ ସୋମବାର ଅପରାହ୍ନ ୩ଟା ସମୟରେ କିଛି ସନ୍ଦିଗ୍ଧ ଡକାୟତି ପାଇଁ ଯୋଜନା କରୁଥିବା ପୋଲିସ କୌଣସି ସୂତ୍ରରୁ ଖବର ପାଇ ଚଢାଉ କରିଥିଲା । ଏଥିରେ ତିନି ଜଣ ଡକାୟତଙ୍କୁ ପୋଲିସ ଧରିବାରେ ସକ୍ଷମ ହୋଇଥିବା ବେଳେ ଆଉ ଦୁଇ ଜଣ ଡକାୟତ ବାଇକରେ ଫେରାର ହୋଇଯାଇଛନ୍ତି ।
ଘଟଣାସ୍ଥଳରୁ ପୋଲିସ ଏକ ପିସ୍ତଲ ସମେତ ଗୋଟିଏ ଖଣ୍ଡା, ତିନୋଟି ମୋବାଇଲ, 9 ଶହ ଟଙ୍କା, କିଛି ଆପତ୍ତିଜନକ କାଗଜ ଓ ଗୋଟିଏ ମୋଟର ସାଇକେଲକୁ ଜବତ କରିଛି । ଅନ୍ୟପକ୍ଷେ ଅଭିଯୁକ୍ତମାନଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଛି । ତେବେ ଫେରାର ଅନ୍ୟ 2 ଡକାୟତଙ୍କ ପରିଚୟ ମିଳିସାରିଥିବା ବେଳେ ସେମାନଙ୍କୁ ଶୀଘ୍ର ଧରାଯିବ ବୋଲି ବୌଦ୍ଧ ଥାନା ଅଧିକାରୀ ତପସ୍ବିନୀ କହଁର ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
