ଭଦ୍ରକ: ରାଜ୍ୟରେ ଦିନକୁ ଦିନ ବଢିଚାଲିଛି ଚୋରି, ଡକାୟତି । ଚିକିତ୍ସା ପାଇଁ ଆସିଥିବା ରୋଗୀ ଓ ସମ୍ପର୍କୀୟଙ୍କୁ ବି ଛାଡୁନାହାନ୍ତି ଅପରାଧି । କାେରୋନା ଟେଷ୍ଟ ପାଇଁ ଲାଇନରେ ଥିବାବେଳେ ଲୁଟୁଛନ୍ତି ଲେଡି ଲୁଟେରା । ଏପରି ଏକ ଘଟଣା ଦେଖିବାକୁ ମିଳିଛି ଭଦ୍ରକ ମୁଖ୍ୟ ଚିକିତ୍ସାଳୟରେ । ଯାହାର ଭିଜୁଆଲ ସିସିଟିଭିରେ କଏଦ ହୋଇଛି । ସୂଚନା ଅନୁଯାୟୀ, ଭଦ୍ରକ ଜିଲ୍ଲା ଭବାନିବିନ୍ଧା ଗ୍ରାମର କୌଶଲ୍ୟା ଖାମୁରାଇ ନାମକ ମହିଳା ନିଜର ସ୍ବାମୀଙ୍କ ଅପରେସନ ପାଇଁ କୋଭିଡ ଟେଷ୍ଟ ନିମନ୍ତେ ଆସିଥିଲେ ।
ଅପରେସନ ପୂର୍ବରୁ କୋଭିଡ ଟେଷ୍ଟ ପାଇଁ ଭଦ୍ରକ ମୁଖ୍ୟ ଚିକିତ୍ସାଳୟରେ ଧାଡିରେ ଛିଡା ହୋଇଥିଲେ । କୋଭିଡ ଟେଷ୍ଟ ପାଇଁ ଲାଇନରେ ଥିବାବେଳେ କୌଶଳ କ୍ରମେ ବ୍ୟାଗରୁ ୧୫ ହଜାର ଟଙ୍କା କାଢି ନେଇଥିବା ଅଭିଯୋଗ ହୋଇଛି । ଯାହାର ଭିଜୁଆଲ ମଧ୍ୟ ସିସିଟିଭିରେ କଏଦ ହୋଇଛି । ଏନେଇ ମହିଳା ଜଣଙ୍କ ଭଦ୍ରକ ସଦର ଥାନାରେ ଏତଲା ଦେଇଛନ୍ତି । ଅଭିଯୋଗ ଆଧାରରେ ପୋଲିସ ମୁଖ୍ୟଚିକିତ୍ସାଳୟରେ ପହଞ୍ଚି ସିସିଟିଭି ଆଧାରରେ ତଦନ୍ତ ଆରମ୍ଭ କରିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
